प्रधानमन्त्रीका कानुनविद्को तर्क : संसद पुनर्स्थापना भए पनि नयाँ सरकार बन्दैन
हाम्रा कुरा
प्रकाशित २०७८ असार १८ शुक्रबार
1.2k
Shares
काठमाडौँ । प्रतिनिधिसभा विघटनको मुद्दामा शुक्रवार पनि संवैधानिक इजलासमा सुनुवाइ जारी छ । जारी इजलासको सुनुवाइमा केही बेरअघि प्रधानमन्त्री केपी शर्मा ओलीका तर्फबाट अधिवक्ता रमेश गुरागाईँले बहस गरेका छन् ।
बहसका क्रममा उनले उनले विघटित प्रतिनिधिसभा पुनर्स्थापना भए पनि नयाँ सरकार बन्ने अवस्था नरहेको दाबी गरेका छन् । गुरागाईँले प्रतिनिधिसभा पुनर्स्थापना भएपछि ७६ (४) अनुसार विश्वासको मत प्रधानमन्त्रीले नपाउने र नयाँ प्रधानमन्त्री बनाउन पनि कसैले बहुमत जुटाउन नसक्ने उनले दाबी गरेका हुन् ।
‘पहिले पनि प्रतिनिधि सभा पुनर्स्थापना भएपछि सांसदबाट नयाँ सरकार बन्न सकेन, न त अविश्वासको प्रस्ताव नै दर्ता भयो, अब पनि पुनर्स्थापना भयो भने पनि सरकार बन्ने अवस्था छैन’, गुरागाईँले बहस गर्दै भने ।
बहसकै क्रममा अर्का अधिवक्ता विष्णुमणि अधिकारीले राष्ट्रपतिले प्रधानमन्त्रीमा गरिएका दाबीको मूल्याङ्कन गर्न सक्ने दाबी गरे । संवैधानिक इजलासमा शुक्रवारै सरकारी पक्षको बहसका लागि निर्धारित समय सकिँदै छ । त्यसपछि शुक्रवारैबाट सभामुख पक्षको बहस सुरु हुनेछ ।
