काठमाडौँ। नेपाल सद्भावना पार्टीको राष्ट्रिय अध्यक्ष रामकुमार महतोले हिन्दी भाषालाई राष्ट्रिय सम्पर्क भाषा बनाउन अपिल गरेका छन् । सोमवार रिपोर्टर्स क्लब नेपालमा पत्रकार सम्मेलन गर्दै महतोले २२ बुँदे माग प्रस्तुत गर्दै सरकारसँग यस्तो अपिल गरेका हुन् ।

पत्रकार सम्मेलनमा महतोले भने, ‘हिन्दी भाषालाई नेपालको राष्ट्रिय सम्पर्क भाषाको रूपमा संविधानमा दर्ता गराउनुपर्छ ।’ अध्यक्ष महतोले नागरिकता प्रमाण-पत्रको समस्या दिन-प्रतिदिन जटिल अवस्थामा गइरहेको उल्लेख गरे । उनले भने, ‘नागरिकताको समस्या रोजी-रोटीसँग जोडिएको छ ।’ नागरिकताको समस्या समाधान र समान नागरिकको अधिकारको लागि भएको उनको भनाई थियो ।

राज्यको पुर्न संरचना गरेर काठमाडौँलाई केन्द्र बनाएर स्थानीय र सात प्रदेशलाई हटाएर पाँच प्रदेश मात्र बनाउनुपर्नेमा उनले जोड दिए ।  ‘काठमाडौँ उपत्यकाका आसपासका क्षेत्रलाई केन्द्र शासिक प्रदेश बनाउनु पर्ने र पूर्वी पहाड प्रदेश, पश्चिमी पहाड प्रदेश, पूर्वी मधेस प्रदेश र पश्चिम मधेस प्रदेशलाई स्वायत्त प्रदेश बनाउनुपर्छ ।’-उनले भने । 

उनले अप्रमाणित मुद्दामा षड्यन्त्रपूर्वक वर्षौँदेखि जेलमा राखिएका मधेसी नेता रेशम चौधरीलगायत अन्य कार्यकर्ताको झुटा मुद्दा खारेज गरेर सकुशल रिहाइ गर्न सरकारसँग माग गरे ।

कार्यक्रममा अध्यक्ष महतोले संवैधानिक र राजनीतिक उच्च पदको लागि कार्यकालको निश्चित गर्नुपर्नेमा जोड दिए । उनले भने,‘उमेर हद्दको सीमा एवं न्यूनतम ज्ञान मापदण्ड कायमको लागि हो ।’ उनले नेपाल सरकार र मधेसको बिचमा भएको २२ र ८ बुँदे सम्झौताको पूर्ण व्यवहारिक कार्यान्वयन गर्नुपर्ने बताए । जर्बजस्ती जारी भएको संविधान नेपालको पुरै जनताको लागि हो भन्दै महतोले आफूहरूको सङ्घर्ष संविधान संशोधनको लागि भएको जानकारी दिए ।

समाजवादमा व्यक्तिवाद हुँदैन भन्दै उनले देशको समग्र क्षेत्रमा व्याप्त व्यक्तिवाद, निजीबाट, परिवारवाद, नातावाद र कृपावादको अन्त्य गरिनुपर्ने जिकिर गरे ।