काठमाडौं । जापानको टोकियोमा आयोजित टोकियो ओलम्पिकमा चिनियाँ सबैभन्दा कम उमेरको जोडीले स्वर्णपदक जितेको छ । महिला सिन्क्रोनाइज्ड १० मिटर डाइभिङमा १५ वर्षे युसी चेङ र १७ वर्षे जियाकी झेङको जोडीले स्वर्ण जितेको हो ।
यो स्पर्धामा अमेरिकाले रजत तथा मेक्सिकोले कास्यपदक जितेको छ । चीनले सन् २००० को सिड्नी ओलम्पिकदेखि राखिएको यो स्पष्र्धामा लगातार स्वर्ण जित्न सफल भएको छ । चीनको यो लगातार पाँचौं स्वर्ण हो ।
यो पदकसँगै पदक तालिकामा अमेरिकालाई पछि पार्दै चीन अगाडि लागेको छ । सोमबार रातिसम्म आयोजक जापान ८ स्वर्णसहित अग्रस्थानमा रहेकामा मंगलबार तेस्रो स्थानमा झरेको छ ।
चीन ९ स्वर्णसहित शीर्ष स्थानमा छ । चीन ९ स्वर्ण, ५ रजत र ७ कास्यसहित २१ पदक बटुलेर शीर्ष स्थानमा पुगेको हो । अमेरिका ८ स्वर्ण, ५ रजत र ८ कास्य गरी २१ पदकसहित दोस्रो स्थानमा छ ।
जापानको ८ स्वर्ण, २ रजत र ४ कास्य रहेको छ । चौथो स्थानको रुसी ओलम्पिक कमिटीे ५ स्वर्ण, ७ रजत र ४ कास्यसहित १६ पदकबाट चौथो स्थानमा छ । ग्रेट ब्रिटेन ४ स्वर्ण, ५ रजत र १ कार्यसहित १० पदकबाट पाचौं स्थानमा छ ।
हालसम्म २५ राष्ट्रले स्वर्णपदक जित्दा ५३ राष्ट्रले पदक जितेका छन् ।
