असोज ४ गतेदेखि कोरोनाविरुद्धको खोप भेरोसेलको दोस्रो मात्रा लगाइने

हाम्रा कुरा

प्रकाशित २०७८ असोज २ शनिबार

काठमाडौं । सरकारले असोज ४ गतेदेखि कोरोना भाइरसविरुद्धको खोप भेरोसेलको दोस्रो मात्रा लगाउने भएको छ । जिल्ला स्वास्थ्य कार्यालयले काठमाडौंले एक सूचना जारी गर्दै जिल्लाका १४५ खोप केन्द्रबाट असोज ४ देखि ६ गतेसम्म तोकिएका केन्द्रमा गएर खोप लगाउन आग्रह गरेको छ ।

असोज ४ गतेबाट भेरोसेल खोपको दोस्रो मात्रा लगाउनका लागि स्वास्थ्य कार्यालय काठमाडौंले जिल्लाका सबै पालिकालाई पत्रचार समेत गरेको जनाएको छ । भेरोसेलको पहिलो मात्रा लगाएका र २१ दिन पुगेकालाई दोस्रो मात्रा लगाउन लागिएको हो ।

काठमाडौं जिल्लाका ११ वटै पालिकाका यसअघि सञ्चालनमा रहेका खोप केन्द्रमा खोप लगाइने स्वास्थ्य कार्यालयले जनाएको छ । स्वास्थ्य कार्यालयका प्रमुख जनस्वास्थ्य प्रशासक बद्रीबहादुर खड्काका अनुसार खोप लगाउनका लागि केन्द्रहरु निर्धारण गरिएको छ । सरकारले शुक्रबार मात्र चीनबाट ४४ लाख मात्रा भेरोसेल खोप नेपाल ल्याएको थियो ।

काठमाडौं महानगरपालिकामा ३२, कीर्तिपुरमा १०, चन्द्रागिरिमा १५, नागार्जुनमा १०, तारकेश्वर ११, दक्षिणकालीमा नौ, बूढानीलकण्ठमा १३, टोखामा ११ तथा गोकर्णेश्वर, शङ्करापुर र वागेश्वरी मनहरामा नौ/नौ खोप केन्द्र तोकिएका छन् ।
खोप केन्द्रहरु
नेपाल प्रहरी अस्पताल महाराजगन्ज
सशस्त्र पहरी बल अस्पताल, बलम्बु
वीर अस्पताल, रत्नपार्क
शिक्षण अस्पताल, महाराजगन्ज
निजामती कर्मचारी अस्पताल, बानेश्वर
परोपकार प्रसूती तथा स्त्रीरोग अस्पताल, थापाथली
वीरेन्द्र अस्पताल, छाउनी