९ जिल्लामा पाँच सय बढी संक्रमित, देशभर १२ जनाको मृत्यु

हाम्रा कुरा

प्रकाशित २०७८ असोज १२ मंगलबार

काठमाडौँ । नेपालका नौ जिल्लामा पाँच सय भन्दा बढी संक्रमित रहेका छन् । स्वास्थ्य तथा जनसङ्ख्या मन्त्रालयले सार्वजनिक गरेको तथ्याङ्कअनुसार मोरङ, सुनसरी, झापा, काठमाडौँ, ललितपुर, भक्तपुर, मकवानपुर, कास्की र रुपन्देहीमा पाँच सयभन्दा बढी संक्रमित रहेका छन् । यस्तै दुई सय भन्दा बढी संक्रमित भएका जिल्ला २० रहेका छन् ।

यस्तै सङ्क्रमणबाट पछिल्लो २४ घण्टामा १२ जनाको ज्यान गएको छ । अहिलेसम्म सङ्क्रमणबाट ११ हजार ११५ जनाको निधन भइसकेको छ ।

पछिल्लो २४ घण्टामा एक हजार १५८ कोरोना संक्रमित थपिएका छन् । १४ हजार तीन जनामा कोभिड-१९ परीक्षण गर्दा एक हजार १५८ जनामा सङ्क्रमण पाइएको हो । मङ्गलवार थपिएकासँगै देशभर सक्रिय सङ्क्रमितको सङ्ख्या १८ हजार ४२२ पुगेको छ । हाल सङ्क्रमण दर १८.९ प्रतिशत रहेको छ ।

हाल देशभर ३६४ जना सघन उपचार कक्ष (आइसियु), १२० जना भेन्टिलेटर, १७ हजार १२५ जना होम आइसोलेसन, एक हजार २९७ जना संस्थागत आइसोलेसन र ३२८ जना क्वारेनटिनमा रहेका छन् ।

पछिल्लो २४ घण्टामा एक हजार ३१८ ले सङ्क्रमणमुक्त भएका छन् । यससँगै नेपालमा हालसम्म सङ्क्रमणमुक्त हुने कूल सङ्ख्या सात लाख ६३ हजार ७३४ रहेको छ । नेपालमा सङ्क्रमणमुक्त हुने दर ९६.३ प्रतिशत रहेको छ ।

यस्तै आज देशभरि दुई लाख आठ हजार ९० ले कोरोना भाइरसविरुद्धको खोप लगाएका छन् । अहिलेसम्म ६९ लाख ६० हजार ८२८ ले पहिलो मात्रा र ६२ लाख पाँच हजार ७७० जनाले पूर्ण मात्राको खोप लगाएका छन् ।