तरलताको समस्या तत्काल समाधानका लागि पहल गर्न वरिष्ठ उपाध्यक्ष ढकालको आग्रह
हाम्रा कुरा
प्रकाशित २०७८ कार्तिक २६ शुक्रबार
1.1k
Shares
भक्तपुर। नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकालले बैङ्किङ क्षेत्रमा देखिएको तरलताको समस्या तत्काल समाधान गर्नुपर्ने बताएका छन्। शुक्रवार भक्तपुर उद्योग वाणिज्य सङ्घको ३४औँ वार्षिक साधारण सभा तथा अधिवेशनको उद्घाटन समारोहमा बोल्दै वरिष्ठ उपाध्यक्ष ढकालले कोभिडको महामारीबाट थला परेको व्यावसायिक क्षेत्र बिस्तारै सुधार हुने अवस्थामा रहेको हुँदा अहिले बजारमा देखिएको तरलताको समस्या समाधानको लागि तत्काल पहल लिन नेपाल सरकार तथा नेपाल राष्ट्र बैङ्कलाई आग्रह समेत गरे।
“विगत दुई वर्षभन्दा लामो समयदेखि कोभिडको महामारीबाट शिथिल रहेको उद्योग व्यवसाय बिस्तारै सुधार हुने अवस्थामा रहेको थियो। तर अहिले बैङ्किङ क्षेत्रमा देखिएको तरलता समस्याले यसलाई थप मारमा पारेको छ। यसलाई तत्काल समाधान गरिएन भने यसले ठुलो र दीर्घकालीन समस्या पुर्याउनेछ,” उनले भने। उनले बजारमा देखिएको तरलताको समस्या समाधानको लागि नेपाल उद्योग वाणिज्य महासङ्घको तर्फबाट पनि सरकारको ध्यानाकर्षण गरिसकेको बताए।
यस वर्ष बजेट ल्याउन ढिलो हुँदा सरकारी खर्च कम भएको र रेमिट्यान्सको आप्रवाह पनि घटेकोले बजारमा तरलता अभाव देखिएको उनले बताए। मुलुकको आर्थिक विकासमा निजी क्षेत्रको भूमिकाको चर्चा गर्दै उनले राज्यका हरेक संयन्त्रले निजी क्षेत्रसँग मिलेर काम गर्नुपर्ने बताए।
“यो स्पष्ट छ कि निजी क्षेत्र विकास र आर्थिक वृद्धिको मुख्य इन्जिन हो। सफल व्यवसायहरूले आर्थिक वृद्धि गर्छन्, रोजगारी सृजना गर्छन् र कर तिर्छन् जसबाट विभिन्न सेवा र लगानीको लागि फाइनान्स हुन्छ।
विकासोन्मुख देशहरूमा निजी क्षेत्रको भूमिका झन् ठुलो र महत्त्वपूर्ण हुन्छ। यसले ठुलो सङ्ख्यामा रोजगारी सृजना गरेको हुन्छ, लगानीको लागि रकम जुटाउँछ र सरकारी राजश्वमा महत्त्वपूर्ण योगदान गर्छ,” त्यसैले निजी क्षेत्रसँग सहकार्य गर्दा विकास र आर्थिक वृद्धि सहज हुन्छ।
