काठमाडौं । महाधिवेशनको लागि मिति तोक्ने तर तोकिएको मितिमा महाविधेशन नगर्ने, फेरि महाधिवेशनको अर्को तिथि तय गर्ने नेपाली कांग्रेस र यसका भ्रातृ तथा शुभेच्छुक संगठनहरूको परम्परा जस्तै भएको छ । 

यो परम्पराबाट नेपाली कांग्रेस निकट नेपाल निजामती कर्मचारी युनियन पनि अलग हुन सकेन । आगामी मंसिर २१, २२ र २३ गते हुने भनिएको नेपाल निजामती कर्मचारी युनियनको ८औं महाधिवेशन तोकिएको मितिमा नहुने निश्चित भएको छ । 

तत्काल युनियनको केन्द्रीय समितिको बैठक बस्ने र उक्त बैठकले मंसिरमा हुने भनिएको महाधिवेशन तिथी  स्थगित गर्ने भएको छ । युनियनका उपमहासचिव यज्ञराज अर्यालले मंसिर २१, २२ र २३ गते हुने भनिएको युनियनको ८औं महाधिवेशन तोकिएको मितिमा नहुने करिब करिब निश्चित भएको र केबल घोषणा गर्न मात्र बाँकी रहेको बताए । 

‘मंसिरमै हाम्रो मातृ पार्टी नेपाली कांग्रेसको महाधिवेशन हुने भयो । मातृ पार्टीको महाविधेशनसँग जुध्ने भएपछि युनियनको महाधिवेशनको तिथी स्थगित गर्ने निष्कर्षमा पुगेका हौं’, अर्यालले भने, ‘तोकिएको मितिमा महाविधेशन नहुनुमा तयारी नपुगेर पनि हो ।’ 

उनका अनुसार अहिलेसम्म ३ वटा जिल्लामात्र जिल्ला अधिवेशन भएका छन् । मंसिर ११ गतेसम्म सबै जिल्लामा जिल्ला अधिवेशन तथा विभागहरुमा विभागीय अधिवेशन सम्पन्न गर्न केन्द्रीय समितिले सबै जिल्ला समिति तथा विभागहरुलाई निर्देशन दिएको छ । 

तर विभाग तथा जिल्ला समितिहरूले केन्द्रको निर्देशनलाई कार्यान्वयन गर्न आलटाल गरिरहेका छन् । युनियनको विधानअनुसार युनियनको अधिवेशन एक वर्ष पहिले नै भइसक्नु पर्ने हो । पोहोर साल झापामा युनियनको केन्द्रीय समितिको बैठक बोलाइ उक्त बैठकले वर्तमान कार्यसमितिको कार्यकाल एक वर्ष थप गर्ने निर्णय गरेको थियो ।  

२०७४ चैत ४, ५ र ६ गते चितवनको युनियनको ७औं महाधिवेशन सम्पन्न भएको थियो । उक्त महाधिवेशनले गोपाल पोखरेलको नेतृत्वमा नयाँ कार्यसमिति चयन गरेको थियो । युनियनको विधानमा युनियनको नव निर्वाचित कार्यसमितिको कार्यकाल ३ वर्ष राखिएको छ ।

विशेष कारणवश एक वर्ष थप गर्न सक्ने व्यवस्था विधानमा गरिएको छ । उक्त व्यवस्था अनुसार वर्तमान कार्यसमितिको कार्यकाल एक वर्ष थप गरिएको हो । तोकिएको मितिमा महाधिवेशन हुन नसक्नुमा युनियनका कार्यसमितिका पदाधिकारीहरू कोभिड १९को महामारीलाई पनि कारण देखाउँछन् । 

तर युनियनका एक केन्द्रीय सदस्यले भने, ‘महाधिवेशन गर्न चाहेको भए मंसिरमै महाधिवेशन हुने अवस्था थियो । तर अहिले केही ढिलो भएको छ ।’  

युनियनका अर्का एक पदाधिकारीले भने पार्टीका केन्द्रीय तहका नेताहरूसँग सरसल्लाह गरी मंसिरमा हुने भनिएको महाधिवेशन स्थगित गर्ने तयारी गरिएको बताए ।