नुवाकोट । नुवाकोट जिल्ला आजदेखि कोरोना संक्रमणमुक्त भएको छ । यसअघि संक्रमित भएर उपचार गराउँदै आएका विदुर नगरपालिका घर भएका दुई जना व्यक्ति संक्रमणमुक्त भएसँगै नुवाकोट जिल्ला कोरोना संक्रमणमुक्त जिल्ला भएको स्वास्थ्य कार्यालय नुवाकोटका सूचना अधिकारी उत्तम खनालले जानकारी दिए ।
उनको अनुसार जिल्लामा यसअघि संक्रमित भएका सबैजना निको भएको र नयाँ संक्रमित थप नभएसँगै कोरोनामुक्त भएको हो । विश्व महामारीका रूपमा फैलिएको कोरोना रोग नुवाकोटमा सबैभन्दा पहिला विसं २०७७ जेठ ११ गते भित्रिएको थियो । कोरोनाको पहिलो लहर विसं २०७७ फागुन २३ गते संक्रमणमुक्त भएको थियो । पुनःदोस्रो लहरको संक्रमण आएसँगै विसं २०७७ चैत २४ गते जिल्लामा कोरोनाको नयाँ संक्रमण देखा परेको थियो । त्यसपछि निरन्तर बढ्दै गएको रोगको संक्रमणले जिल्लामा सक्रिय संक्रमितको सङ्ख्या एक हजार २०० भन्दा बढीसमेत पुगेको थियो ।
कोरोनाका कारण पहिलो लहरमा एक जना निधन भएकामा दोस्रो लहरमा थप ५१ जनाको निधन भएसँगै जिल्लामा हालसम्म निधन हुनेको सङ्ख्या ५२ जना पुगेको स्वास्थ्य कार्यालय नुवाकोटका प्रमुख (वरिष्ठ जनस्वास्थ्य प्रशासक) महेन्द्रध्वज अधिकारीले जानकारी दिए ।
उनका अनुसार कोरोनाको पहिलो लहरमा एक हजार १४५ जना संक्रमित पहिचान भएकामा दोस्रो लहरमा सात हजार २४५ जना थपिएका थिए । “अहिलेसम्म जिल्लामा कोरोना संक्रमित हुने सङ्ख्या कूल आठ हजार ३९० पुगेपछि संक्रमणमुक्त बनेको छ ।” वरिष्ठ जनस्वास्थ्य प्रशासक अधिकारीले भने, “जिल्ला संक्रमणमुक्त भए पनि नेपालमा रोगको संक्रमण कायमै रहेको र विश्वमा नयाँ भेरियन्ट ओमिक्रोन फैलँदै गएकाले रोगको जोखिम कायम रहेकाले सावधान अपनाउन आग्रह गरिएको छ ।
संक्रमणबाट बच्न जल्लावासीलाई अन्य जिल्लासँग आउजाउ गर्दा सावधानि अपनाउन, बाहिर जिल्लाबाट आउने व्यक्तिको स्वास्थ्यप्रति निगरानी गर्न, कोरोना रोगबाट बच्न निःशुल्क उपलब्ध गराइएको रोगविरुद्धको खोपको सेवा लिन भनिएको छ ।
कोरोनालगायत अन्य सरुवा रोगबाटसमेत बच्नका लागि स्वास्थ्य सुरक्षाको मापदण्डको पालनाअन्तर्गत घरबाट बाहिर सार्वजनिकस्थलमा आजजाउ गर्दा अनिवार्यरुपमा मास्क लगाउन, भौतिक दूरी कायम राख्न, साबुनपानीले राम्रोसँग हातधुन तथा स्यानिटाइजरको प्रयोग गर्नका लागि स्वास्थ्य कार्यालयले स्मरण गराएको छ । अहिले कोरोना रोगको संक्रमण नभएको समयमा यसबाट बच्नका लागि सावधानी अपनाउनुपर्ने भएकाले स्वास्थ्य सुरक्षाको मापदण्डको पालना गर्न र रोगसँग मिल्दोजुल्दो लक्षण देखिएमा सर्तकता अपनाउँदै स्वास्थ्य परीक्षण गराउन एवं घरकै एकान्तबासमा बस्न कार्यालयले भनेको छ ।
नुवाकोटका कोरोना रोग रोक्नको लागी त्रिशूली अस्पतालमा परीक्षणका लागि पीसीआर प्रयोगशाला, अक्सिजन उद्योग, भेन्टिलेटर, आइसियु र एचडियुसहित आइशोसन वार्ड सञ्चालनमा ल्याइएको छ । त्रिशूली अस्पताल, खरानीटार अस्पताल र स्थानीय तहले संक्रमितको उपचारका लागि करिब ५०० आइसोलेशन श्यया सञ्चालनमा ल्याएको थिए । यो अहिले पनि कायम नै राखिएको छ । रासस
