बढ्यो कोरोना, ३२६ थपिएकामध्ये १८४ उपत्यकाका, सक्रिय संक्रमित पाँच हजार नाघे

हाम्रा कुरा

प्रकाशित २०७८ पुष १९ सोमबार

काठमाडौं । झन्डै एकमहिनादेखि २ सयको हाराहारीमा रहेको दैनिक नयाँ संक्रमितको संख्या शनिबारपछि सोमबार अर्थात् आज पनि बढेर ३ सय नाघेको छ । पछिल्लो २४ घण्टामा ३२६ जना नयाँ संक्रमित थपिएका हुन् । हिजाे २१६ जना नयाँ संक्रमित थपिएका थिए ।

नयाँ संक्रमित हुनेको संख्या बढ्दा ४ हजारमा झरेको सक्रिय संक्रमितको संख्या समेत ५ हजार ५ पुगेको छ । पछिल्लो २४ घण्टामा थप २ जनाको मृत्यु भएको छ ।

३२६ संक्रमित थपिँदा निको हुनेको संख्या भने २५५ रहेको छ । देशभर थपिने संक्रमितमध्ये आधा भन्दा बढी १८४ संक्रमित काठमाडौं उपत्यकाका हुन् । काठमाडौंमा १४०, ललितपुरमा १६ र भक्तपुरमा २८ जनामा संक्रमण पुष्टि भएको हो ।

हालसम्म नेपालमा ८ लाख २९ हजार २ सय ७७ जनामा पीसीआर र ९६ हजार २ सय ८० जनामा एन्टीजेन विधिबाट संक्रमण पुष्टि भएको छ । संक्रमितमध्ये ८ लाख १२ हजार ६ सय ७४ जना निको भइसकेका छन् । ११ हजार ५ सय ९८ जनाको मृत्यु भएको छ।

पछिल्लो २४ घण्टामा १२ हजार ४ सय ९८ जनाको नमूना परीक्षण गरिएको थियो ।