ललिता निवास जग्गा प्रकरणका आरोपी विरुद्ध राजस्व छली मुद्दा
हाम्रा कुरा
प्रकाशित २०७८ पुष २० मंगलबार
1.1k
Shares
काठमाडौं । राजस्व अनुसन्धान विभागले आनसान इन्टरनेशनल प्रालिका सञ्चालक शोभाकान्त ढकाल, सरोज ढकाल, उमाकुमारी ढकाल, सान्टु श्रेष्ठ तथा उक्त फर्मको लेखा परीक्षण गर्ने राजेश्वर एण्ड कम्पनीका सञ्चालक राजेश्वर श्रेष्ठविरुद्ध उच्च अदालत पाटन, ललितपुरमा राजस्व चुहावटसम्बन्धी मुद्दा दायर गरेको छ ।
शोभाकान्त ढकाल बालुवाटारस्थित ललिता निवास जग्गा प्रकरणका मुख्य आरोपी हुन् ।
काठमाडौँको नागार्जुन नगरपालिका–१, नर्सरीचोक स्थायी ठेगाना भएको आनसान इन्टरनेशनल प्रालि र ललितपुर महानगरपालिका–७ सुनधारा स्थायी ठेगाना भएको राजेश्वर एण्ड कम्पनीले राजस्व चुहावट गर्ने मनसायले जालसाजीयुक्त, नक्कली तथा झुट्टा मूल्य अभिवृद्धि कर विवरण, वित्तीय विवरण तथा आय विवरण तयार गरी कारोबार नै नभएको देखाई राजस्व चुहावट गरेकाले रु एक अर्ब २० करोड ४९ लाख १७ हजार ८२४ बिगो असुल गर्न विभागले माग गरेको छ ।
साथै विभागले कायम भएको बिगोको शतप्रतिशत जरिवाना गर्न उच्च अदालतसमक्ष अभियोग पत्र दायर गरेको हो । राजस्व चुहावट गर्न सघाएबापत लेखा परीक्षक श्रेष्ठलाई मतियारमा आधा सजायको माग दाबी विभागले गरेको छ । रासस
