गोरखा । गोरखाको गण्डकी गाउँपालिका वडा नं. १ बुट्टारस्थित रिभर फन वीचले जीपलाइन सञ्चालन गरेको छ ।
छ करोड ५० लाख रुपैयाँमा सो परियोजना तयार गरिएको बताइएको छ ।
किड्स एड्भेञ्चर पार्क, पिङ, रोप कोर्ष, क्याफे सञ्चालन गरी दुवैतर्फ खाने बस्ने व्यवस्था गरिएको छ ।
परियोजनाका डिजाइनर ई. मुकेश अधिकारीका अनुसार जिपलाइन निर्माणका लागि मात्रैलाई दुई करोड ५० लाख खर्च भएको छ ।
जीपलाइनमा दुई वटा तार छन् । दुई जनासँगै खेल्न मिल्ने खालको जीपलाइन रहेको छ ।
जीपलाइन मास्टर सतिश मैनालीका अनुसार यसमा बसेर खेल्न, भिडियो खिच्न, फोटो खिच्न सकिन्छ । त्यहाँ स्काई साइक्लिङ पनि बन्दै छ ।
स्टक्चर निर्माण, स्वीइङ निर्माणको काम पनि अन्तिम चरणमा रहेको उनले जानकारी दिए ।
५८० मिटर लामो जीपलाइनको चार सय मिटर भाग त्रिशूली नदीमाथि पर्ने भएकाले झनै साहसिक र रोमाञ्चक हुने ई. अधिकारीले बताए ।
रिभर फन बीच रिसोर्ट प्रालिका प्रबन्ध निर्देशक शङ्कर अधिकारीले नदीमाथि पर्ने यो जीपलाइन विश्वकै नमुना हुने बताए ।
दुई वटा डोरीको प्रयोग गरिने हुँदा सुरक्षित रहेको उनको भनाइ छ । २०७७ फागुन ४ गते जीपलाइनको शिलान्यास गरिएको थियो ।
१८ मिटर अग्लो पाँच तले टावरको चौथो तलाबाट जीपलाइन सुरु गरिएको छ । जीपलाइन युरोपियन मापदण्डमा भारतीय कम्पनीको प्राविधिक सहयोगमा निर्माण भएको हो ।
कम्पनीले ९ वर्षदेखि रिसोर्ट र र्याफ्टिङ व्यवसाय सञ्चालन गर्दै आएको छ । आन्तरिक र बाह्य पर्यटक त्रिशूलीमा र्याफ्टीका लागि आउने गर्छन् ।
मुख्य सिजनका बेला रिसोर्ट खचाखच हुने गरेको छ । जीपलाइन पृथ्वी राजमार्ग छेउमा रहेकाले पोखरा, चितवन, बन्दीपुर, मनकामना लगायत ठाउँमा आउजाउ गर्ने पर्यटकको रोजाइमा पर्न सक्ने विश्वास छ ।
