पोखरा । कोरोना भाइरस संक्रमणबाट गण्डकी प्रदेशमा थप चार जनाको मृत्यु भएको छ । मृत्यु हुनेमध्ये ३ जना पुरुष र एक जना महिला छन् । उनीहरू सबैको पोखरामा मृत्यु भएको हो ।
मृत्यु हुनेमा म्याग्दी अन्नपूर्ण गाउँपालिका वडा नं. ७ की ६० वर्षकी महिला रहेकी छन् । माघ २९ गते कोरोना संक्रमित उनको उपचारका क्रममा पोखरा स्वास्थ्य विज्ञान प्रतिष्ठानमा मृत्यु भएको प्रदेश स्वास्थ्य निर्देशनालयले जनाएको छ ।
यसै गरी पर्वत कुश्मा नगरपालिका वडा नंं. २ का ७० वर्षका पुरुषको पनि कोरोना संक्रमणकै कारण मृत्यु भएको छ । माघ २१ गते कोरोना संक्रमित भएका उनको उपचारका क्रममा पोखरा स्वास्थ्य विज्ञान प्रतिष्ठानमै मृत्यु भएको बताइन्छ ।
कोरोना संक्रमणबाटै मृत्यु हुनेमा तनहुँको भिमाद नगरपालिका वडा नं. ५ का ९० वर्षका पुरुष छन् । सोमबार कोरोना संक्रमित उनको उपचारका क्रममा आज बिहान पोखरा स्वास्थ्य विज्ञान प्रतिष्ठानमै मृत्यु भएको हो ।
यस्तै, स्याङ्जा पुतलीबजार नगरपालिका वडा नं. २ का ६४ वर्षका पुरुषको पनि कोरोना संक्रमणकै कारण मृत्यु भएको छ । माघ १७ गते कोरोना संक्रमित उनको उपचारका क्रममा मणिपाल शिक्षण अस्पतालमा मृत्यु भएको हो ।
योसहित गण्डकीमा कोरोना संक्रमणबाट मृत्यु हुनेको सङ्ख्या १४ सय ५२ जना पुगेको छ । गण्डकीमा पछिल्लो २४ घण्टामा १४८ जना संक्रमित थपिएका छन् ।
