राजस्व र सरकारी खर्चबीच तालमेल नमिल्दा अर्थतन्त्रमा सङ्कट : वरिष्ठ उपाध्यक्ष ढकाल

हाम्रा कुरा

प्रकाशित २०७८ फागुन १२ बिहिबार

काठमाडौँ। नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकालले राजस्व सङ्कलन र सरकारी खर्चबीच तालमेल हुन नसक्दा अर्थतन्त्र सङ्कटमा पर्ने गरेको बताएका छन्।

सरकारले राजस्व नियमित रूपमा उठाउने तर खर्च भने समयमै गर्न नसक्दा अर्थतन्त्रमा बर्सेनि एउटै समस्या देखिने गरेको र यसबाट निजी क्षेत्र प्रत्यक्ष रूपमा मर्कामा परेको उनको भनाइ छ।

'राजश्व सङ्कलन शत प्रतिशत हुने तर खर्च नहुने हुँदा तरलता समस्या समेत सृजना भएको छ,' पर्वत उद्योग वाणिज्य सङ्घको साधारण सभालाई बिहीबार सम्बोधन गर्दै उनले भने, 'यसका निम्ति खर्च गर्नै पर्ने बाध्यात्मक परिस्थिति निर्माण गरिनुपर्छ।'

वरिष्ठ उपाध्यक्ष ढकालले तरलता सङ्कट समाधानका लागि नेपाल सरकारको खर्च प्रणालीमा सुधार हुनुपर्ने बताए। सङ्घीय सरकारसहित प्रदेश र स्थानीय सरकारको खर्च गर्ने परिमाण न्यून भएको तर राजस्व सङ्कलन ९० प्रतिशतभन्दा बढी हुने कारणले तरलता सङ्कट हुने गरेको उनको भनाइ छ।

यसका निमित्त खर्च गर्नै पर्ने प्रणालीको विकास गर्दै राजनीतिक र प्रशासनिक नेतृत्वलाई जिम्मेवार बनाइनु पर्ने ढकालले बताए। यस्तै, सरकार फेरिएसँगै बजेट र कार्यक्रम संशोधन हुने नीतिगत अस्थिरता पनि समस्याका रूपमा रहेको उनको भनाइ छ।

आईएमई समूहका अध्यक्ष समेत रहेका ढकालले पर्वत जिल्लाभित्र र समग्र गण्डकी प्रदेशमा निजी क्षेत्रको लगानीमा स्थानीय स्तरमा बन्ने आयोजनाहरूमा आफ्नो तथा समूहको साझेदारी रहने प्रतिबद्धता व्यक्त गरे।