काठमाडौं । विश्वव्यापी महामारीका रूपमा देखापरेका कोभिड-१९ संक्रमणबाट नेपालमा झण्डै १२ हजारले ज्यान गुमाएका छन् । स्वास्थ्य तथा जनसङ्ख्या मन्त्रालयको तथ्याङ्कअनुसार कोरोना संक्रमणबाट ११ हजार ९३२ जनाको ज्यान गएको छ ।
कोरोनाको विभिन्न ‘भेरियन्ट’मध्ये डेल्टा भेरियन्टका कारण नेपालमा धेरै नागरिकको मृत्यु भएको थियो । पछिल्लो समय फैलिएको ‘ओमिक्रोन’ भेरियन्ट बढी संक्रामक देखिए पनि कम घातक पाइएको चिकित्सकको भनाइ छ ।
पछिल्लो २४ घण्टामा थप एक जनाको कोरोनाका कारण मृत्यु भएको छ । नेपालमा कुल संक्रमितको १.२ प्रतिशतको मृत्यु भएको मन्त्रालयको तथ्याङ्कले देखाएको छ ।
नेपालमा कोरोनाबाट सबैभन्दा बढी ६० देखि ६९ वर्ष उमेर समूहका व्यक्तिले ज्यान गुमाएका छन् । सो उमेर समूहका दुई हजार ५०१ को संक्रमणका कारण ज्यान गएको मन्त्रालयले जनाएको छ । यस्तै ७० देखि ७९ वर्ष उमेर समूहका दुई हजार ३७५, ५० देखि ५९ वर्ष उमेर समूहका दुई हजार २९३ र ४० देखि ४० वर्प उमेर समूहका एक हजार ६६३ जनाले ज्यान गुमाएका छन् ।
यस्तै ८० वर्षभन्दा माथि उमेर समूहका एक हजार ६३७, ३० देखि ३९ वर्ष उमेर समूहका ९३६, २० देखि २९ वर्ष उमेर समूहका ३७९, नौ वर्ष मुनिका ५१ र उमेर नखुलेका १३ को कोरोना संक्रमणका कारण मृत्यु भएको मन्त्रालयले जनाएको छ ।
पछिल्लो २४ घण्टामा आठ हजार ६२८ नमुना परीक्षण गर्दा २७५ जनामा संक्रमण पुष्टि भएको छ । पाँच हजार ४५२ नमुनाको पिसीआर परीक्षण गर्दा १५८ र तीन हजार १७६ नमुनाको एन्टिजेन परीक्षणमा ११७ वटामा संक्रमण पुष्टि भएको मन्त्रालयले जनाएको छ ।
आज ५५५ जना कोरोना संक्रमणमुक्त भएका छन् । नेपालमा हालसम्म नौ लाख ५५ हजार ४५८ जना कोरोनामुक्त भएको मन्त्रालयको तथ्याङ्क छ । सक्रिय संक्रमितको सङ्ख्या नौ हजार २८० छ । शुक्रवार देशभरका खोप केन्द्रमार्फत एक लाख २२ हजार ४९३ ले कोरोनाविरुद्धको खोप लगाएका छन् ।
हालसम्म १० लाख ५६ हजार ७७२ ले कोरोनाविरुद्धको ‘बुस्टर डोज’ लगाएका छन् । नेपालमा एक करोड ७३ लाख छ हजार ६४२ पूर्ण मात्रा, एक करोड ८४ लाख ५० हजार ७०९ पहिलो मात्रा खोप लगाएको मन्त्रालयले जनाएको छ ।
