जनकपुरधाम। मिथिलाको महाकुम्भ भनिने १५ दिने मिथिला माध्यमिकी परिक्रमा आइतबार परिक्रमा अन्तर्गत चौथो दिन महोत्तरीको मटिहानीमा पुगेको छ । रामायणकालीन स्थल महोत्तरीको मटिहानी पुगेको हो ।

शुक्रवार भारत विहारको कल्याणेश्वर स्थानमा १५ दिने परिक्रमाको लागि यात्रीहरूले सङ्कल्प लिई शनिवार गिरिजा स्थान पुगेका थिए । मिथिलाको ऐतिहासिक, पौराणिक र धार्मिक आस्थाको धरोहरका रूपमा रहेको १५ दिने परिक्रमा बिहीबारदेखि शुरु भए पनि शुक्रवार कल्याणेश्वरमा सङ्कल्प लिए पछि औपचारिक रूपमा शुरुवात भएको हो ।

प्राचीन मिथिलाको राजधानी जनकपुरधामको अग्नि कुण्डबाट किशोरीजी अर्थात् माता जानकी र कचुरी मठबाट मिथिला विहारी भगवान् रामचन्द्रको दुई प्रमुख डोलाको नेतृत्वमा मिथिला मध्यमा परिक्रमा बिहीबारदेखि शुरु भएको हो । यस परिक्रमामा १ सय ३३ किलोमिटरको पदयात्रामा नेपाल र भारतका विभिन्न स्थानका ठुलो सङ्ख्यामा साधु सन्त र गृहस्थ आश्रमका श्रद्धालुको सहभागिता रहेको हो।

फागुन कृष्णपक्षको औँसीमा धनुषाको ठेरा कचुरी मठबाट भगवान् राम र जानकीको डोलासहित परिक्रमा गरिँदै छ । परिक्रमा फूलहरू (गिरिजास्थान) हुँदै महोत्तरीको मटिहानी, जलेश्वर, मडै ध्रुबकुण्ड, कञ्चनवन, पर्वता, धनुषाधाम, औरही, विशौल, कल्याणेश्वर र फागुन पूर्णिमाको दिन जनकपुर फर्केर अन्तगृह परिक्रमा गरेपछि समापन हुनेछ।

परिक्रमा अन्तर्गत चौथो दिन महोत्तरीको मटिहानीमा परिक्रमाको यात्री टोली पुग्ने भएपछि परिक्रमा यात्रीको स्वागतमा मटिहानी नगरपालिका आइतबार सार्वजनिक बिदा दिइएको छ । १५ दिवसीय मिथिला माध्यमिकी परिक्रमा चौथो दिन आइतबार मटिहानीमा विश्राम गर्ने हुँदा मटिहानी नगरभर सार्वजनिक बिदा दिएको नगरप्रमुख हरिप्रसाद मण्डलले बताए । मण्डलका अनुसार बिदाका दिन विद्यालय र सार्वजनिक सङ्घ–संस्था बन्द रहने छ । यस अवसरमा मटिहानीमा भव्य मेलाको आयोजना गरिएको छ ।

सोमबार परिक्रमाका यात्री जलेश्वरनाथ महादेवको दर्शन गर्न महोत्तरी जिल्लाको सदरमुकाम जलेश्वर पुग्नेछन् । त्यसपछि मडै,मङ्गलवार ध्रुबकुण्ड,बुधबार कञ्चनवन हरिणमरी, बिहीबार पर्वता, शुक्रवार धनुषाधाम, शनिवार सतोषर ,आइतबार औरही ,सोमबार विशौल,मङ्गलवार करुणा हुँदै कल्याणेश्वर स्थानमा पुगेर दर्शन पश्चात् जनकपुरधाम फर्किने परम्परा रहेको छ ।