काठमाडौँ । पत्रकार प्रिमेश शिवाकोटीको निधन भएको छ । नेपाल प्रेस युनियन रौतहटका अध्यक्षसमेत रहेका अन्नपूर्ण पोस्ट दैनिकका संवाददाता शिवाकोटीको ३६ वर्षकै उमेरमा सोमबार बिहान निधन भएको हो ।
चन्द्रपुर नगरपालिका-७ निवासी शिवाकोटी विगत केही समयदेखि मृगौलाको समस्याबाट ग्रसित थिए । उनको चितवन नेशनल मेडिकल कलेजमा उपचार भइरहेको थियो ।
उपचार गराएर फर्किएपछि सोमबार आफ्नै निवासमा उनको निधन भएको हो । उनकी श्रीमती र एक छोरी छिन् ।
शिवाकोटीको निधनमा नेपाल प्रेस युनियनले तीन दिन शोक मनाउने निर्णय गरेको छ । शिवाकोटीको अकल्पनीय निधनमा गहिरो दुःख व्यक्त गर्दै शोक प्रस्ताव पारित गरिएको हो ।
शिवाकोटीको योगदान र संस्थाप्रतिको समर्पणको सम्मान गर्दै नेपाल प्रेस युनियन केन्द्रीय समिति, प्रदेश समिति तथा शाखाहरूले तीन दिनसम्म कुनै पनि औपचारिक कार्यक्रम आयोजना नगर्ने युनियनका महासचिव दिलिप पौडेलले जनाएका छन् ।
