एमडी नियुक्तिमा तलमाथि गरे कडा कदम चाल्ने वर्कर्स युनियनको चेतावनी
टेलिकममा एमडी नियुक्त गर्दा शक्तिकेन्द्रको प्रभावमा नपर्न चेतावनी
हाम्रा कुरा
प्रकाशित २०७८ चैत २१ सोमबार
856
Shares
काठमाडौं । नेपाल टेलिकम वर्कर्स युनियन (एनटीसीडब्ल्यूयू)ले कुनै शक्तिकेन्द्रको निर्देशन वा प्रभावमा नपरी टेलिकममा प्रबन्ध निर्देशक (एमडी)नियुक्त गर्न आग्रह गरेको छ । एमडी नियुक्ति प्रक्रिया अघि बढेका बेला टेलिकममा विवादित मान्छे ल्याउन खोजेको भन्दै कर्मचारी पक्षले आपत्ति जनाएको हो ।
नेपाल टेलिकमको एमडी नियुक्ति र सेवा सुविधा सम्बन्धी निर्देशिका नै फेरेर मिलीभगतका साथ नेपाली जनताको नासो र सम्पत्तिमाथि खेलबाड नगर्न समेत युनियनले चेतावनी दिएको छ ।
युनियनले कम्पनीमा लामो समय सेवा गरेर दूरसञ्चार क्षेत्रमा विशेषज्ञता हासिल गर्दै संस्थाको विकास र विस्तारमा संलग्न रही हरेक प्रकारका समस्याहरू बुझी समाधानका उपायहरू अवलम्बन गरेका वरिष्ठ व्यक्ति नै उत्तम हुने भन्दै सोही अनुरूप एमडी नियुक्त गर्न आग्रह गरेको छ ।
युनियनका महासचिव महेश्वर खड्काद्वारा जारी विज्ञप्तिमा कम्पनी र राज्यको अहित हुने गरी नियुक्ति गरियो भने जस्तोसुकै कदम चाल्न तयार रहेको भन्दै युनियनले कडा चेतावनी दिएको छ ।
