अनअराइभल भिसाका लागि नगद बोकेर आउन पर्यटकलाई आग्रह

रासस,

प्रकाशित २०७९ वैशाख ३ शनिबार

काठमाडौँ। त्रिभुवन अन्तर्राष्ट्रिय विमानस्थल अध्यागमन कार्यालयले विद्युतीय कारोबार झन्झटिलो भएको भन्दै पर्यटकलाई नगदै बोकेर आउन आग्रह गरेको छ।

त्रिभुवन अन्तर्राष्ट्रिय विमानस्थलका प्रबन्धक प्रेमनाथ ठाकुरका अनुसार विमानस्थल ओर्लिएपछि पाउने भिसा अर्थात् अनअराइभल भिसा लिने पर्यटकहरूलाई भिसा शुल्क बुझाउन सजिलोका लागि भन्दै कार्यालयले २०० अमेरिकी डलर बराबरको विदेशी मुद्रा बोकेर आउन आग्रह गरिएको हो।

उनले भने, “सफ्टवेयरले काम नगर्दा अनअराइभल भिसा लिने पर्यटकलाई तीनदेखि चार घण्टा लाइन बस्नुपरेको छ, मैले अध्यागमन विभागका प्रमुखलाई भनेर पर्यटकको सहायताका लागि नगद ल्याउन सूचना निकाल्न आग्रह गरेको थिए, अहिले सूचना प्रकाशन भएको हो।”

अध्यागमन कार्यालयले निकालेको सूचनामा अहिले नेपाल आउने पर्यटकको सङ्ख्या धेरै रहेको र विमानस्थलमा एउटा मात्र एटिएम मेसिन रहेकाले विद्युतीय कारोबारका अरू माध्ययममा पनि प्राविधिक समस्या आउने गरेकाले भिडभाड तथा झन्झटबाट जोगिनका लागि नगदै बोकेर आउन भनिएको छ।

उक्त सूचनामा अहिले अनअराइभल भिसा शुल्कबापत बैङ्किङ भुक्तानी मात्र स्वीकार गर्ने र बैङ्कले अमेरिकी डलरसँगै अरू देशको मुद्रा पनि स्वीकार गर्ने उल्लेख गरिएको छ।