नयाँ दिल्ली। भारतले सोमबार ७० औँ स्वतन्त्रता दिवस मनाएको छ । उसले विशेष समारोहको आयोजना गरी सोमबार सो दिवस मनाएको राजधानी नयाँ दिल्लीबाट प्राप्त समाचारमा जनाइएको छ ।
सो दिवसका लागि मध्यनजर गर्दै भारतभर विशेष सुरक्षा व्यवस्था कायम गरिएको छ । विशेषगरी भारत प्रशासित काश्मिर र पाकिस्तान प्रशासित काश्मिरतर्फ सुरक्षा सतर्कता बढाइएको हो ।
स्वतन्त्रता दिवसलाई मध्यनजर गरी सो सुरक्षाको प्रबन्ध मिलाइएको राजधानी नयाँ दिल्लीबाट प्राप्त पछिल्लो समाचारमा जनाइएको छ ।
भारतमा आफ्नो साम्राज्यवाद कायम राखेको बेलायत सन् १९४७ को अगष्ट १५ मा भारतबाट भागेको थियो ।
यसै दिनको स्मरण गरी भारतमा स्वतन्त्रता दिवस मनाउने गरिन्छ । हरेक वर्ष अगष्ट १५ मा पर्ने यस दिवस सोमबारको ७० औँ हो ।
सो अवसरमा प्रधानमन्त्री नरेन्द्र मोदीले नयाँ दिल्लीमा दिएको स्वतन्त्रता भाषणमा छिमेकी पाकिस्तानको तिखो आलोचना गरेका छन् ।
उनले पाकिस्तानले आतङ्ककारीहरुलाई प्रश्रय दिने गरेको आरोप लगाए । उनले भने – आतङ्कवादीहरुले भारतमाथि आक्रमण गरिरहेका छन् तर तिनैको गुणगान पाकिस्तानले गाइरहेको छ ।
हामीमाथि आक्रमण गर्नेलाई पाकिस्तानले जय जयकार गर्नेगर्छ तर पनि पाकिस्तानमा गत वर्ष भएको तालिवानको आक्रमणबाट कम्तीमा पनि १३० जना बालबालिका मारिएको घटनामा भने हामीले आतङ्कवादीहरुको कडा भन्दा कडा विरोध गरेका थियौँ– प्रधानमन्त्री मोदीले भने ।
साथै प्रधानमन्त्री मोदीले पाकिस्तानको बलुचिस्तान र पाकिस्तान प्रशासित काश्मिर क्षेत्रमा मानवअधिकार हनन गरेको आरोप पनि लगाए ।
उनले भने – त्यस क्षेत्रका नागरिकले हामीलाई राम्रो मानेका छन् किनभने हामीले उनीहरुका समस्याको बारेमा विचार विमर्श गर्ने गरेका छौँ ।
