हस्ताक्षर नभएका मतपत्र बदर गर्ने सहमतिपछि महाङ्कालमा पुनः मतगणना

हाम्रा कुरा

प्रकाशित २०७९ जेठ १ आइतबार

ललितपुर । केही मतपत्रमा मतदान अधिकृतको हस्ताक्षर नभेटिएपछि स्थगित भएको महाङ्काल गाउँपालिकाको मतगणना पुनः शुरु भएको छ ।

मतगणनाका क्रममा कतिपय मतपत्रमा मतदान अधिकृतको हस्ताक्षर नभेटिएपछि गणना स्थगित गरिएको थियो । उम्मेदवार र पार्टीका प्रतिनिधिसहित छलफलले हस्ताक्षर नभएकालाई बदर गर्ने सहमति भएपछि मतगणना सञ्चालन भएको हो ।

शुक्रबार राति १ बजेदेखि मत गणना शुरु भएकामा बिहान ७ बजे स्थगित भएको थियो । १७ मतपत्रमा हस्ताक्षर नभएको पाइएको थियो ।

महाङ्काल गाउँपालिकामा जम्मा नौ सय मत गणना हुँदा नेपाली कांग्रेसका गणेश केसीको अग्रता रहेको छ । केसीले ४१७, नेकपा एमालेकी कमला तामाङको ३२४ मत र उपाध्यक्षमा नेकपा माओवादीकी डोल्मा लामाले ३८५ र नेकपा एमालेका पुरुषोतम हुमागाइँले २९२ मत ल्याएका थिए ।

वडा नं ६ ठूला दुर्लुङबाट मतगणना शुरु भएको हो । वडाध्यक्षमा नेपाली कांग्रेसका विनोद चौरेलले ३६९ मत र एमालेका रमण बञ्जाराले २९८ ल्याएका छन् । महाङ्काल गाउँपालिकामा नौ हजार १२ मतदाता रहेकामा सात हजार छ सय मत खसेको छ । यो ७७ दशमलव ९६ प्रतिशत हो ।

राति अबेर मात्रै मतपत्र आएपछि गणना शुरु भएको थियो । ललितपुरका अरू पालिकाजस्तै महाङ्कालमा नेपाली कांग्रेस र नेकपा माओवादी गठबन्धनबाट निर्वाचनमा सहभागी छन् । हाल गणना भइरहेको वडामा भने नेपाली कांग्रेस र माओवादी छुट्टाछुट्टै प्रतिस्पर्धामा छन् ।