स्थानीय निर्वाचन : काँग्रेसमा बढी अराजकता देखियो

स्थानीय निर्वाचन : काँग्रेसमा बढी अराजकता देखियो - माओवादी नेता गजुरेल

हाम्रा कुरा

प्रकाशित २०७९ जेठ १ आइतबार

काठमाडौँ। नेकपा (माओवादी केन्द्र)ले स्थानीय तह निर्वाचनको प्रारम्भिक परिणामप्रति असन्तुष्टि जनाएको छ। गठबन्धन दलहरूबिच भएको तालमेलको मर्मअनुसार अधिकांश ठाउँमा काँग्रेसले गठबन्धनमा रहेका अन्य दलका उम्मेदवारहरूलाई मत नदिएको प्रारम्भिक मत परिणामले पुष्टि गरेको माओवादी नेता हरिबोल गजुरेलले बताए।

‘गठबन्धनका अन्य दलका मतदाताले तालमेल हुँदा काँग्रेसबाट जुन पदमा उम्मेदवारी परेको छ, इमानदारीपूर्वक मत दिएको देखियो तर काँग्रेसबाट देखिएन। बरु बागी उठेकालाई भोट दिएर जिताएको देखियो’, उनले भने, ‘गठबन्धन दलहरूबिचको तालमेलको मर्मअनुसार मत नदिएर काँग्रेसबाट अराजकता प्रदर्शन भयो।’

काँग्रेसबाट बागी उम्मेदवार भएर जनकपुर उपमहानगरपालिकामा मनोजकुमार शाहले अग्रता लिइरहेका छन्। गठबन्धनका उम्मेदवार लाल किशोर साहको निकै कम मत छ।

पाँचथरको फालेलुङ गाउँपालिका–१ मा त काँग्रेसकै बागी अनिश गुरागाइँले गठबन्धनको उम्मेदवारलाई पराजित गरे। काभ्रेको धुलिखेलमा पनि काँग्रेसका बागी उम्मेदवार शक्तिशाली देखिएका छन्। अन्य स्थानीय तहमा पनि छ।

परिणाम सोचे जस्तो आउने नदेखिएको र नआउने देखिनुमा काँग्रेस जिम्मेवार रहेको नेता गजुरेलले बताए। तर, पनि माओवादीले यस पटक २०७४ सालमा भन्दा बढी स्थानीय भने जित्ने उनको दाबी छ।