बुटवलमा खेलराज जितको खुशी साट्दै, पीडामा रहेका एमाले कार्यकर्ताहरु आक्रामक, झडपको स्थिति

नारायण वली,

प्रकाशित २०७९ जेठ ७ शनिबार

बुटवल । बुटवल उपमहानगरपालिकाको नेतृत्व नेपाली कांग्रेसका उम्मेदवार खेलराज पाण्डेले सम्हाल्ने भएका छन् । उनले फराकिलो अन्तरले एमालेका उम्मेदवारलाई हराएका छन् । त्योसँगै कांग्रेसी नेता तथा कार्यकर्ताहरु खुशीमा छन् ।

खेलराजलाई जितको अवीर लगाइदिइरहेका छन् । उपमेयरमा भने एमालेकी सावित्रादेवी अर्यालले जितेकी छिन् । उनको जितमा पनि एमालेका नेता कार्यकर्ताले खुशी मनाइरहेका छन् ।

तर तीन दशकको लालकिल्ला तोडिने भएपछि एमालेका नेता कार्यकर्ता आक्रोशित भएका छन् । जसका कारण यतिबेला बुटवल नगरको प्राङ्गणमा दुई पक्षबीच नाराबाजी चलेको छ ।

कांग्रेस खुशीमा र एमाले दुःखमा छ । जसका कारण एमाले कार्यकर्ताहरु आक्रोशित भएका हुन् । प्रतिष्पर्धात्मक रुपमा चलेको नाराबाजीले उग्र रुप लिने सम्भावना बढेपछि प्रहरीले कांग्रेस पक्षलाई त्यहाँबाट हटाएको छ ।

प्रहरीले एमालेलाई निर्वाध रुपमा होहल्ला गर्न दिएको छ ।