पटना । भारतको बिहारस्थित गोपालगञ्जमा विषाक्त मदिरा सेवनबाट कम्तीमा १८ जनाको मृत्यु भएको छ ।
मदिरा सेवनबाट बिरामी भएका केहीलाई अस्पतालमा भर्ना गरिएको छ । उनीहरुको अवस्था पनि गम्भीर रहेको बताइएको छ ।
विषाक्त मदिरा सेवन गर्नेहरुमा स्वासप्रश्वासमा समस्या हुने, पेट देख्ने, वान्ता हुने समस्या देखिएको थियो । त्यसको एक घण्टाभित्रै उनीहरुको मृत्यु भएको प्रहरीले जनाएको छ ।
गैरकानुनी रुपले बनेको यस्तो मदिरा सेवनबाट थुप्रैको ज्यान गएपछि जिल्ला प्रशासनले २५ जना सुरक्षाकर्मीलाई निलम्बन गरेको छ ।
निलम्बनमा पर्नेमा १५ जना अधिकृतसमेत परेका छन् । विषाक्त मदिरा उत्पादन नियन्त्रण गर्न नसकेको भन्दै उनीहरुलाई निलम्बन गरिएको हो ।
जिल्ला प्रशासनले १४ जनाविरुद्ध अवैध मदिरा कारोबारमा संलग्न रहेको आरोपमा मुद्दासमेत दायर गरेको छ ।
६ जनालाई पक्राउ गरिएको छ ।
