ब्रिक्सको चौधौँ शिखर सम्मेलन आगामी साता चीनमा हुँदै

एएनआई,

प्रकाशित २०७९ असार ३ शुक्रबार

बेइजिङ। चीनका राष्ट्रपति सी चिनफिङले ब्राजिल, रुस, भारत, चीन र दक्षिण अफ्रिका सदस्य रहेको ब्रिक्सको १४ औँ शिखर सम्मेलन आगामी साता आयोजना गर्ने भएका छन्।

चिनियाँ विदेश मन्त्रालयका अनुसार श्रव्य दृश्यका माध्यमबाट आयोजना हुने उक्त सम्मेलनको मुख्य विषय ‘उच्च गुणस्तरको ब्रिक्स साझेदारी विश्वव्यापी विकासका लागि नयाँ युगको सुरुवात’ हुनेछ। राष्ट्रपति सीले यही असार १० गते विश्व विकाससम्बन्धी उच्चस्तरीय बैठक आयोजना गर्नेछन्।

बैठकमा ब्रिक्स नेता,उदीयमान अर्थतन्त्र भएका मुलुक र विकासोन्मुख देशका नेताले भाग लिनेछन्। चिनियाँ कम्युनिस्ट पार्टी (सिपिसी) केन्द्रीय समितिको विदेश मामिला आयोगको कार्यालयका निर्देशक याङ जेइचीको अध्यक्षतामा ब्रिक्स राष्ट्रका राष्ट्रिय सुरक्षा सल्लाहकार र राष्ट्रिय सुरक्षासम्बन्धी उच्च प्रतिनिधिहरूको सहभागितामा भएको १२ औँ बैठकपछि हुन लागेको हो।

गत बुधवार भएको उक्त बैठकमा प्रति आतङ्कवाद र साइबर सुरक्षासम्बन्धी कार्यदलको समीक्षा भएको थियो। बैठकका सहभागीले अन्तर्राष्ट्रिय आतङ्कवादको प्रतिवाद र साइबर सुरक्षा सहयोगका लागि योजना एवम् मार्गचित्र बनाउन सहमति जनाएका छन्। साथै उनीहरूले विश्वव्यापी समस्यालाई विश्वसनीयता, समानता र जबाफदेहीताका साथ सम्बोधन गर्न तथा बहुपक्षीय प्रणालीमा तत्काल सुधारको आवश्यकतामा जोड दिएका थिए।