इलाम । जिल्लाको रोङ गाउँपालिकाको नीति तथा कार्यक्रममा कृषि उत्पादन बिक्री विवरणको आधारमा प्रतिकेजी अनुदानको ब्यवस्था मिलाउने नीति तथा कार्यक्रम ल्याएको छ ।
एक वडा एक सहकारी बनाउन सहकारी मर्ज नीतिसहित बलियो सहकारीको परिकल्पना सहित किसानको छरिएर रहेको कृषि उत्पादनलाई सहकारीले खरिद, प्याकेजिङ्ग र बजारीकरण गर्नुपर्ने र उक्त सहकारीको खरिद विवरणको आधारमा रु ८० प्रतिकेजी अनुदान दिँदै प्याकेजिङ्ग र बजारीकरणमा सहयोग गर्ने नीति अवलम्बन गरेको हो ।
किसानलाई उत्पादनमा सहयोग गर्न सहकारीमार्फत सहुलियत कर्जाको आवश्यक सहजीकरण गरिदिने तर स्थानीय सरकारले उत्पादनपछि मात्र सहकारीमार्फत अनुदान दिँदा अनुदानको दुरुपयोग नहुने भएकोले यो नीति लिएको बताइन्छ ।
यो वर्ष गुन्द्रुक र सिन्कीबाट शुरु गरेर आगामी दिनमा अन्य उत्पादनलाईसमेत यसरी नै व्यवस्था मिलाउँदै लगिने पालिकाले जनाएको छ । गाउँमा छरिएर रहेको कृषि उत्पादनलाई सहकारीले खरिद गर्ने कार्यमासमेत आवश्यक परे गाउँपालिकाले सहयोग गर्ने भएको छ ।
त्यसरी सहकारीले खरिद गरेको उत्पादनको बजारीकरणमा पालिका आफैं लागिपरेर देशका विभिन्न सुपरमार्केट रोङ गाउँपालिकाको गुन्द्रुक र सिन्की ग्राहकले खरिद गर्न पाउने गरिको योजना बनाइएको हो ।
गुणस्तरीय उत्पादनको लागि बीउ तथा तालिमकोसमेत सहकारीमार्फत व्यवस्था गरिने जनाइएको छ ।
नेपालमा वार्षिक करोडौंको गुन्द्रुक आयात भइरहेको बताइरहँदा स्थानीय तहमा पालिकाहरुले यो किसिमको अनुदान दिने हो भने घरेलु उत्पादनको प्रयोग त बढ्ने थियो भने आयात पनि कम हुने अपेक्षा गरिएको छ ।
