काठमाडौं । अमेरिकी अन्तरिक्ष अन्वेषण एजेन्सी नासाका प्रमुखले चीनले अन्तरिक्ष कार्यक्रमको हिस्साको रूपमा चन्द्रमा कब्जा गर्न सक्ने चेतावनी दिएका छन् ।
नासाका प्रमुख बील नेल्सनले जर्मन पत्रिका बिल्डसँग शनिवार एक अन्तर्वार्तामा बोल्दै आफू चीनको अन्तरिक्ष महत्त्वाकाङ्क्षाबाट चिन्तित भएको बताएका थिए ।
उनले बेइजिङको चन्द्रमा अन्वेषण योजनाका बारेमा बोल्दै भनेका छन्,'हामी धेरै चिन्तित हुनुपर्छ कि चीन चन्द्रमामा अवतरण गर्दैछ र भन्दै छ : यो हाम्रो हो, तपाईँ बाहिर बस्नुहोस् ।'
विगत एक दशकमा आफ्नो अन्तरिक्ष कार्यक्रमको गतिलाई तीव्र पारेको चीनले चन्द्रमाको अन्वेषणलाई केन्द्रित बनाएको छ।
चीनले सन् २०१३ मा पहिलो पटक यात्रुबिनाको यानलाई चन्द्रमामा अवतरण गरेको थियो । यसै दशकमा चीनले चन्द्रमाको दक्षिणी ध्रुवमा यात्रु बिनाको यान पठाउने योजना बनाएको छ ।
यसले यस दशकको अन्त्यमा चन्द्रमामा अन्तरिक्ष यात्रीहरू पठाउन पर्याप्त शक्तिशाली रकेटहरू प्रक्षेपण गर्ने योजना पनि बनाएको छ र सन् २०३० को आसपासमा मङ्गल ग्रहको नमूना फिर्ता अभियानमा पनि आफ्नो दृष्टि राखेको छ।
