कुमारी आमा निहारिकालाई भेट्न शिक्षण अस्पताल पुगे मेयर बालेन
हाम्रा कुरा
प्रकाशित २०७९ साउन २८ शनिबार
1.1k
Shares
काठमाडौं । काठमाडौं महानागरपालिकाका मेयर वालेन्द्र साह (बालेन) ले त्रिवि शिक्षण अस्पतालमा रहेकी कुमारी आमा निहारिका राजपुतलाई भेटेका छन् । बलात्कारबाट जन्मिएको आफ्नो बच्चाको डीएनए परीक्षण गर्न माग गर्दै निहारिका काठमाडौंको माइतीघरमा लामो समयदेखि आन्दोलनरत छिन् ।
केही समयअघि गृह मन्त्रालयले उनको मागमाथि छानबिन गर्ने आश्वासन दिएपछि आन्दोलन रोकेकी थिइन् । तर मन्त्रालयले प्रतिबद्धता जनाएअनुसार काम शुरु नगरेपछि उनी पुनः काठमाडौं आएकी छिन् ।
यही क्रममा उनले शुक्रबार राष्ट्रपति कार्यालयअघि आत्मदाहको प्रयास गरेकी थिइन् । उनको प्रयासलाई प्रहरीले विफल पारेको थियो । उनको मानसिक स्वास्थ्य जाँचका लागि भन्दै प्रहरी प्रशासनले उनलाई अहिले शिक्षण अस्पतालमा राखेको छ ।
अस्पतालमा रहेकी निहारिकालाई भेटेपछि सामाजिक सञ्जालमार्फत फोटो सार्वजनिक गर्दै मेयर बालेनले उनको माग जायज भएको बताएका छन् ।
उनले फेसबुकमा लेखेका छन् ‘आफ्नो बच्चाको डीएनए टेस्ट गरिदे मात्रै त भनेको रैछ । यति गर्न एउटी आमाले जल्न तयार हुनु पर्ने ? यो अत्ति हो । यो अत्याचार हो । कानूनीराज्य यस्तो हुँदैन । अभिभावक भनिने राज्य यस्तो हुनु हुँदैन ।’
