स्थानीय तहका सवा लाख उम्मेदवारमाथि निर्वाचन आयोगले थाल्यो कारबाही [विवरणसहित]

हाम्रा कुरा

प्रकाशित २०७९ साउन ३१ मंगलबार

काठमाडौं । निर्वाचन आयोगले स्थानीय तह निर्वाचनका सवा लाख उम्मेदवारमाथि कारबाही थालेको छ । स्थानीय तहको निर्वाचनमा उम्मेदवार बनेर खर्च विवरण नबुझाउने उम्मेदवारहरुलाई कारबाहीको प्रक्रिया थालेको आयोगले जनाएको छ ।

आयोगले प्रेस विज्ञप्ति जारी गरी निर्वाचनमा गरेको खर्च नबुझाउने र तोकिएको समयभन्दा ढिलो बुझाउने उम्मेदवारलाई कारबाही गर्ने प्रक्रिया थालेको जनाएको हो । खर्चको विवरण नबुझाउने १ लाख १५ हजार १३१ जना र तोकिएको समयावधिभन्दा ढिलोगरी निर्वाचन खर्चको विवरण बुझाउने ८ हजार ६५२ जना गरी १ लाख २३ हजार ७८३ जना उम्मेदवारहरूलाई कारबाही प्रक्रिया थालेको हो ।

उनीहरुलाई निर्वाचन आयोग ऐन २०७३ को दफा २६ बमोजिम किन कारबाही हुनु नपर्ने हो ? भनी आफ्नो सफाई सहितको स्पष्टीकरण सात दिनभित्र सम्बन्धित जिल्लाको जिल्ला निर्वाचन कार्यालयमा पेस गर्न आयोगले आदेश दिएको छ ।