राष्ट्रिय बचत सहकारीको साधारण सभा, मधेस मै पहिलो पटक एटिएम शुरु

निरञ्जन कुमार साह,

प्रकाशित २०७९ असोज ३० आइतबार

जनकपुरधाम। जनकपुरधाम पिडारीचौकस्थित राष्ट्रिय बचत तथा ऋण सहकारी संस्था लिमिटेडको २१औं वार्षिक साधारण सभा भव्यताका साथ सम्पन्न भएको छ ।

संस्थाका अध्यक्ष विद्याकर प्रसाद साहको अध्यक्षता तथा जनकपुरधाम उपमहानगरपालिकाका उप-प्रमुख किशोरी साहको प्रमुख आतिथ्यमा साधारण सभा मनाइएको छ ।

संस्थाको २१औं साधारण सभाको अवसरमा अध्यक्ष साहले संस्थाको चालु आर्थिक वर्ष २०७९-०८० को वार्षिक कार्य योजना तथा अनुमानित आयव्यय र प्रगति प्रतिवेदन प्रस्तुत गरेका छन् ।

संस्थाले चालु आर्थिक वर्ष २०७९र ०८० मा १ करोड ७१ लाख ३० रुपैयाँ जम्मा आम्दानी गर्ने अनुमान गरेको छ भने गत आर्थिक २०८९ र ०७९ को असार मसान्तसम्ममा १ करोड १२ लाख ७३ हजार ५ सय ९१ रुपैयाँ आम्दानी गरेको छ।

जसमा संस्थाले १० लाख ३८ हजार ४ सय ९९ रुपैयाँ बचत गरेको संस्थाका प्रतिवेदनमा उल्लेख छ । यस्तै संस्थाले २०७९ भदौ मसान्तसम्ममा ६ करोड ५० लाख २० हजार १ सय ८७ रुपैयाँ ऋण लगानी गरेको छ ।

जम्मा १ हजार ३ सय ३८ शेयर सदस्य रहेको राष्ट्रिय बचत तथा ऋण सहकारी संस्था लिमिटेडको शेयर पुँजी ६९ लाख ८२ हजार ५ सय रहेको छ । संस्थामा १ सय ९३ जना ऋणी रहेको प्रतिवेदनमा उल्लेख छ ।

साधारण सभाको अवसरमा राष्ट्रिय बचत तथा ऋण सहकारी संस्था लिमिटेडको जनकपुरधाम पिडारी चौकस्थित कार्यालयमा एटिएम सेवाको समेत शुभारम्भ गरेको छ ।