काठमाडौं । रसुवा जिल्लाबाट मङ्सिर ४ मा हुने प्रतिनिधिसभा सदस्यका लागि सत्तापक्षिय गठबन्धनका साझा उम्मेदवार मोहन आचार्य प्रतिस्पर्धी भन्दा बलिया देखिएका छन् । गत बैशाखमा सम्पन्न स्थानीय तहको निर्वाचनको मत परिणामको आँकडा अनुसार नेपाली कांग्रेसका आचार्य प्रतिस्पर्धी नेकपा एमालेका उम्मेदवार छोवाङ तेन्जीन तामाङ भन्दा बलिया देखिएका हुन् ।
यस अधि प्रतिनिधिसभा सदस्यको जिम्मेवारी हासिल गरी सकेका आचार्य रसुवा जिल्लाका पाका र रसुवावासीले मन पराएका उम्मेदवारको पहिचान बनाएका उम्मेदवार हुन् । ५ वटा पालिका रहेको रसुवा जिल्लामा सङ्घीय प्रतिनिधिका लागि एउटा मात्र निर्वाचन क्षेत्र रहेको छ । भने प्रदेश तर्फ दुई वटा निर्वाचन क्षेत्र रहेको छ ।
स्थानीय तहको निर्वाचनमा पाँच मध्य ३ वटा पालिका प्रमुखमा र दुई वटा उप-प्रमुखमा नेपाली कांग्रेसले विजयी हासिल गरेको थियो, भने दुई वटा पालिका प्रमुख र ३ वटा उप-प्रमुखमा नेकपा एमालेलेका उम्मेदवार विजयी भएका थिए । स्थानीय चुनावमा दलहरू एक्ला एक्लै भिडेको अवस्थामा नेकपा एमाले भन्दा १२१ मत कम ल्याए पनि ३ वटा पालिका प्रमुखमा नेपाली कांग्रेसका उम्मेदवार विजयी भएका छन् ।
कुल ३९ हजार ४५९ मतदाता रहेको रसुवा जिल्लामा माओवादी केन्द्र, नेकपा (समाजवादी) लगायतका दलहरूको गठबन्धनका साझा उम्मेदवारका रूपमा मोहन आचार्य प्रतिस्पर्धामा छन् । गएको वैशाख महिनामा सम्पन्न स्थानीय चुनावमा नेकपा एमालेले जिल्लाको पाँच वटै पालिकाको कुल १२ हजार २८७ मत, नेपाली कांग्रेसले १२ हजार १५५, माओवादी केन्द्रले ३२ सय २७ र नेपाल नेकपा (समाजवादी) ले ४६ मत हासिल गरेको थिए ।
सोही मत परिणाम समायोजन गर्दा गठबन्धनको मत कुल १५ हजार ४३९ हुन्छ भने, एमालेको १२ हजार २८७ मत हुन आउँछ । यो परिणामलाई हेर्दा गठबन्धनका तर्फबाटको उम्मेदवारको मत ३१ सय ५२ बढी देखिएकोले रसुवामा गठबन्धनका तर्फबाटका साझा उम्मेदवार नेपाली कांग्रेसका आचार्य विजयी हुने सम्भावना बढी रहेको छ ।
त्यस्तै प्रदेशसभाका लागि (क) बाट नेपाली कांग्रेसका प्रभात लामा तामाङ उम्मेदवार बनेका छन्, भने नेकपा एमालेबाट कुल प्रसाद भट्ट प्रतिस्पर्धामा छन् । त्यस्तै प्रदेशसभा (ख) मा गठबन्धनका तर्फबाट नेकपा माओवादी केन्द्रबाट इन्द्रप्रसाद गोतामे (जगतजंग) र नेकपा एमाले बाट तेम्बेल तामाङ बीच कडा प्रतिस्पर्धा हुँदै छ ।
रसुवा जिल्लामा सङ्घ भन्दा प्रदेशसभाका लागि कडा प्रतिस्पर्धा हुने देखिएको छ । नेपाली कांग्रेसवाट टिकट नपाएका सारदा प्रसाद न्यौपाने नेपाली कांग्रेस (बिपी) पार्टीको उम्मेदवार बन्दै प्रदेशसभाका लागि (ख) बाट प्रतिस्पर्धी गर्दै छन् । न्यौपानेले कांग्रेसको केही मत काट्ने भएकाले प्रदेशसभाका लागि (ख) मा गठबन्धनका इन्द्र प्रसाद गोतामेलाई अफ्ठेरो पर्ने सम्भावना देखिएको छ । तर निरन्तर घर दैलो गठबन्धनको निरन्तर सहकार्यका कारण गोतामे उच्च मनोबलका साथ चुनावमा होमिएका छन् । मतदाताले देखाएको चासो र आश्वासनले आफू जितको नजिक रहेको पनि गोतामेले दावी गर्दै आएका छन् ।
गठबन्धन सहितका दलहरू चुनावी मैदानमा होमिई घर दैलोमा वेस्त हरेका बेला रसुवामा ३ स्वतन्त्र उम्मेदवार पनि प्रचार प्रसारलाई तीव्र बनाई रहेका छन् । स्थानीय चुनावमा काठमाडौ, धरान लगायतका केही स्थानमा स्वतन्त्र उम्मेदवारहरूको सफलता देखेर आफुले पनि जित्ने सपना देखेका स्वतन्त्र उम्मेदवारलाई रसुवामा गठबन्धन सहितका दल सँग प्रतिस्पर्धा गर्नु फलामका चिउरा झैँ हुने देखिन्छ । प्रतिनिधिसभा सदस्यको चुनावमा रसुवा जिल्ला बाट ३ स्वतन्त्र सहित १० पार्टीले प्रतिस्पर्धा गर्दै छन् ।
