राति ८ बजेदेखि मतगणना शुरु हुने, ७० प्रतिशत बढी मत खस्ने प्रमुख निर्वाचन आयुक्त थपलियाको दाबी

हाम्रा कुरा

प्रकाशित २०७९ मंसिर ४ आइतबार

काठमाडौं । बिहान ७ बजेदेखि शुरु भएको आम निर्वाचनको मतदान साँझ ५ बजेसम्म हुँदैछ । मुलुकका हिमाली भेगमा भने चिसोका कारण ढिला गरी मतदान शुरु भएको छ । मतदान सकिएपछि राति ८ बजेदेखि नै गणना हुने भएको छ ।

प्रमुख निर्वाचन आयुक्त दिनेशकुमार थपलियाले राति ८ बजेतिर मतगणना शुरु हुने बताएका हुन् । भक्तपुरको लोकन्थलीस्थित युनिक नेपाल एकेडेमी मतदान केन्द्रबाट मतदान गरिसकेपछि सञ्चारकर्मीसँग प्रमुख आयुक्त थपलियाले मतदान छिटो र सहज बनाउन देशैभरका निर्वाचन अधिकृतहरूलाई आग्रहसमेत गरेका छन् ।

उनले मतदान गर्न एक जनालाई करिब २ मिनेट समय लाग्नेसमेत बताएका छन् । थपलियाले मतदान केन्द्रहरू अपांगतामैत्री बनाइएको जानकारीसमेत दिएका छन् । तर धेरै जसो मतदान केन्द्रमा अपांगता मैत्री नभएको भनी गुनासोसमेत आएको छ ।