काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्ड परिवारसहित सिन्धुपाल्चोकको सुकुटेमा पुगेका छन् । परिवारका सदस्यसहित माओवादीका नेता लिएर प्रचण्ड सुकुटे पुगेका हुन् ।
प्रचण्डसहितको टोलीले भोटेकोसीमा र्याफ्टिङ गरेको छ । प्रचण्डले बुधबारको बास सुकुटेमै बिताउने भएका छन् । छोरीद्वय रेणु र गंगासहित परिवारिक सदस्य, सभामुख अग्निप्रसाद सापकोटासहित माओवादी नेताहरु प्रचण्डसँगै रहेका छन् ।
साथै हालै सम्पन्न निर्वाचनमा सिन्धुपाल्चोक २ बाट निर्वाचित भएका माधव सापकोटा, प्रदेश सभामा निर्वाचित सरल सहयात्री पनि प्रचण्डको टोलीमा देखिएका छन् ।
यसअघि राजनीतिक तनाव बढ्दा अग्नि सापकोटासँग रिफ्रेस हुन सुकुटे पुग्ने गरेका प्रचण्डले सापकोटा सभामुख भएपछि भने यो कार्य रोकेका थिए । यसपालि भने परिवारसँग पुगेका हुन् ।
हुनत निर्वाचन परिणामपछि सरकार बनाउने बेला हुँदा प्रचण्ड तनावमै छन् ।
स्रोतका अनुसार माओवादी नेताहरु फेरि एमालेसँग सहकार्य गरेर सत्ता संचालन गर्न चाहन्छन् । तर सत्ता गठबन्धनलाई टुक्राउन नहुने आवाज पनि आइरहँदा प्रचण्ड केही तनावमा छन् ।
सुकुटेको र्याफ्टिङपछि उनी शान्त भएर फर्किएसँगै राजनीतिले नयाँ स्वरुप लिने अपेक्षा गरिएको छ ।
त्यसो त प्रचण्ड पार्टीको कुनै प्रतिवेदन वा विचार लेख्नुपर्यो भने पनि सुकुटे नै पुग्ने गरेका छन् । यसपालि कस्तो विचार लिएर फर्कन्छन् त्यो भने भोलिका दिनको राजनीतिक रंगले देखाउने छ ।
