काठमाडौं । चीनका पूर्व राष्ट्रपति जियाङ जेमिनको ९६ वर्षको उमेरमा निधन भएको चिनियाँ सरकारी सञ्चारमाध्यमले जनाएका छन् ।
जियाङको बुधबार दिउँसो स्थानीय समय अनुसार १२ बजेर १३ मिनेटमा सांघाई सहरमा ल्युकेमिया र बहुअंग विफलताका कारण मृत्यु भएको आधिकारिक सिन्ह्वा समाचार एजेन्सीले जनाएको छ ।
चिनियाँ सत्तारुढ कम्युनिष्ट पार्टी, संसद, मन्त्रिपरिषद् र सेनाले चिनियाँ जनतालाई संयुक्त पत्रमार्फत शो व्यक्त गर्दै भनेको छ, 'कमरेड जियाङ जेमिनको निधन हाम्रो पार्टी र हाम्रो सेना र हाम्रा सबै जातीय समूहका जनताको लागि अपूरणीय क्षति हो ।'
पत्रमा जियाङ जेमिनलाई उच्च प्रतिष्ठाको उत्कृष्ट नेता, एक महान मार्क्सवादी, राजनेता, सैन्य रणनीतिकार र कूटनीतिज्ञ र लामो समयदेखि परीक्षित कम्युनिस्ट लडाकुको रूपमा वर्णन गरिएको छ ।
चीन र विश्वभरका प्रमुख चिनियाँ कम्युनिष्ट पार्टी (सीसीपी) र सरकारी भवनहरूमा झण्डा आधा झुकाइने सरकारी सञ्चारमाध्यमले जनाएको छ।
