काठमाडौं । ‘मिसन प्रधानमन्त्री’ बनाएका माओवादी अध्यक्ष पुष्पकमल दाहाल प्रचण्डले आधा आधा कार्यकालको पहिलो पटक सरकारको नेतृत्व गर्न नपाए सरकार बाहिर बसेर समर्थन गर्ने भन्दै घुर्की देखाउन थालेका छन् । 

आफू निकट रहेका केही नेताहरुलाई उनले आउँदो सरकारको नेतृत्व गर्न नपाउने हो भने सरकारलाई समर्थन गर्ने तर बाहिर बसेर गर्ने भन्दै घुर्की देखाउन थालेका छन् ।

 ‘अहिले हाम्रो पालो हो मौखिक सहमति पनि त्यही छ त्यसअनुसार काम गर्न पाइएन भने सरकारमा जानुको अर्थ हुन्न’, प्रचण्डले आफू निकटका केही नेताहरुसँग बुधबार साँझ खुमलटारमा भनेका थिए । बुधबार साँझ आफू निकटका नेताहरुसँग भेटघाट गरेका प्रचण्डले त्यस्तो धारणा राखेको माओवादी निकट स्रोतले जनाएको छ ।  

सरकारभन्दा बाहिर बसेर सहयोग गर्नुपर्नेमा माओवादीका वरिष्ठ नेता नारायणकाजी श्रेष्ठ, गिरिराजमणी पोखरेल तथा हरिबोल गजुरेल पनि सहमत रहेका छन् । त्यसैगरी महासचिव देवप्रसाद गुरुङ पनि मौखिक सहमति कार्यान्वयन नभए तत्काल बाहिर बसेर सहयोग गर्नुपर्नै भन्दै प्रचण्डलाई उक्साइरहेका छन् ।  

नेपाली कांग्रेससँगको चुनावी गठबन्धन फलदायी नभएको भन्दै माओवादीका नेताहरूले सार्वजनिकरूपमै अभिव्यक्ति दिइरहेका छन् । गत शनिबार निर्वाचनबारे समीक्षा गर्न बसेको माओवादीको बैठकले एमालेसँग पनि सहकार्य गर्न सक्ने निर्णय गरेको थियो । 

शुरुको बैठकमा सो निर्णय गराएका प्रचण्डले त्यसपछि आइतबार बसेको बैठकले भने गठबन्धनलाई पहिलो प्राथमिकता दिने निर्णय गराए पनि अघिल्लो निर्णय भने खारेज गरेको छैन । 

शनिबारको बैठकपछि माओवादी प्रवक्ता कृष्णबहादुर महराले बैठकको चुरो कुरो बाहिर ल्याएका थिए । ‘अहिलेको गठबन्धन छाड्ने निर्णय भएको छैन । तर एमालेलगायत दलहरूसँग सहकार्यको विकल्पमा हामी खुल्ला छौँ’, महराले भनेका थिए । 

महराले यस्तो अभिव्यक्ति दिएको भोलिपल्टै महासचिव गुरुङले सच्याउदै खण्डन गरेका थिए ।  ‘सत्तागठबन्धनको विकल्पबारे नसोचेको’ भनेर त्यसलाई सच्याउने प्रयत्न गरे । तर आफ्नो भित्री रणनीति कुनै नेतामार्फत बोल्न लगाएर ‘नाडी छाम्ने’ माओवादी केन्द्र अध्यक्ष प्रचण्डको रणनीति हो भन्ने सहजै अनुमान गर्न सकिन्छ ।  

माओवादी नेताहरूले कांग्रेसकै कारण आफ्ना लागि चुनावी नतिजा अनपेक्षित बनेको बताउन थालेपछि प्रधानमन्त्री एवं कांग्रेस सभापति शेरबहादुर देउवाले माओवादी अध्यक्ष  प्रचण्डलाई बोलाएरै ‘गठबन्धनमा रहेर गठबन्धनकै दलविरुद्ध अभिव्यक्ति नदिन’ भनेका थिए । तर प्रचण्डले भित्र भित्रै सरकारमै नजाने भन्दै कांग्रेसलाई घुर्की दिन थालिसकेका छन् ।

देउवासँगको भेटमा ‘अहिलेकै गठबन्धनलाई अगाडि बढाउने’ निष्कर्ष सुनाएर माओवादीका नेताहरूलाई अब गठबन्धनबारे ‘जथाभाबी’ बोल्न रोक लगाउने बाचा गरे पनि त्यो बाचा प्रचण्डबाटै उल्लंघन भइरहेको छ । 

पछिल्लो भेटमा प्रचण्डले आधा आधा कार्यकालको शुरुको प्रधानमन्त्री आफू बन्न पाउनुपर्ने प्रस्ताव गरेका थिए । तर देउवा मौन बसेपछि प्रचण्डमा त्यसप्रकारको छटपटी भएको स्रोतको दाबी छ । माओवादीका अधिकांश नेताले प्रचण्डलाई शुरुआतमै सरकारको नेतृत्व लिन दबाब दिएका कारण प्रचण्डले हौसिएर यस्तो बताएको स्रोतको दाबी छ । 

 ‘सत्ता गठबन्धनको सरकार निर्माण भएपछि देउवा र मबीच चुनाव लगत्तै सरकारको नेतृत्व माओवादीलाई दिने गरी मौखिक समझदारी भएको थियो । गठबन्धन बनाएरै चुनावमा गइयो । कतै राम्रो कतै नराम्रो परिणाम आयो, अब प्रधानमन्त्री बन्ने माओवादीको हो, सोचे जस्तो नतिजा आएन भनेर छोड्ने भन्ने हुँदैन,’ प्रचण्डले आफू निकटका नेताहरुसँग भनेका थिए ।  

उनले शुरु कार्यकालको प्रधानमन्त्री नदिए गठबन्धन सरकारका सहभागी नभई बाहिर बसेर समर्थन गर्न सकिनेसमेत बताएका थिए ।