काठमाडौं । सलमान खानबाट पीडित बताउने अभिनेत्री सोमी अलीले पुनः गम्भीर आरोप लगाएकी छन् । सामाजिक सञ्जालमार्फत अभिनेत्रीले सलमान खानमाथि गम्भीर आरोप लगाएकी हुन् । यसअघि पनि उनले शारीरिक शोषण गरेको आरोप लगाएकी थिइन् ।

अभिनेत्रीले सलमानले घरेलु हिंसा गरेको आरोप लगाएकी छन् । उनले आफू सानैदेखि घरेलु हिंसाको सामना गर्नुपरेको बताएकी छन् । उनको पाँच वर्षको उमेरमा यौन दुर्व्यवहार भएको थियो ।

उनले लेखेकी छन्,' अमेरिकामा १४ वर्षको उमेरमा बलात्कृत भएकी थिए । त्यसपछि भारतमा, त्यो व्यक्तिले घरेलु हिंसा गरे, जसलाई मैले आठ वर्षसम्म डेट गरेँ।'

सोमी अली कुनै समय सलमान खानकी प्रेमिका थिइन् । सोमीले आफ्नो पोस्टमा आफू भारत आउनुको सबैभन्दा ठुलो कारण सलमान भएको बताएकी छन् । १६ वर्षको उमेरमा उनको सलमान खानसँग प्रेम थियो । उनीसँग विवाह गर्न अमेरिकाबाट भारत आएकी थिइन् । तर सलमानले उनीसँग नराम्रो व्यवहार गरेका खुलाएकी छन् ।

सोमी भन्छिन्, 'मेरो दिमाग बच्चा जस्तै थियो'। ठूला पर्दामा निभाएको चरित्र वास्तविक जीवनभन्दा बिलकुलै फरक थियो । जब मैले सत्य बोल्ने प्रयास गरेँ, मानिसहरूले यसलाई पब्लिसिटी स्टन्ट भनेका थिए भन्ने सोच्दा दुःख लाग्छ । कुनै महिलाले पनि मलाई साथ दिएनन् । म मुम्बईमा हुँदा सलमान खानले मलाई गाली र कुटपिट गर्थे । मेरो घरको सहयोगीले म रोएको देखेका छन् । मेरो चिच्याहट सुनेर उनले पनि मलाई हिर्काउन बन्द गर भने । त्यति बेला मेरो मेकअप आर्टिस्ट अजय शेलारले घाउ लुकाउन घाँटी र अन्य धेरै ठाउँमा फाउन्डेसन लगाउनुपर्थ्यो । जब म स्टुडियोमा जान्थेँ, निर्माताहरूले नोटिस गर्थे र अजयलाई ठिक गर्न भन्थे।'

उनले थप लेखेकी छन्, ‘यो कुनै ब्रेकिङ न्युज होइन । सलमानले यो सबै गरेको म एक्लो होइन । तर बाँकीलाई म यसमा समावेश गर्दिन । धेरैले एफआईआर समेत दर्ता गरेका छन् । यी समाचारहरू ९० को दशकमा हेडलाइनको हिस्सा थिए।'

कुनै समय ऐश्वर्या राय बच्चन सलमानसँग सम्बन्धमा थिइन् । उनी पनि सलमानसँग पीडित भएको सञ्चारमाध्यममा आएका थिए । सो समय ऐश्वर्याले सलमानको दुर्व्यवहारको पर्दाफास गरेकी थिइन् । सलमानको सम्बन्ध टुटेपछि अभिनेत्री सोमी अमेरिकामा छिन् ।