काठमाडौं । नेपाली कांग्रेसका सभापति शेरबहादुर देउवाले निवनिर्वाचित सांसदहरूलाई बधाई दिँदै संसद्मा सक्रिय भूमिका निर्वाह गर्न निर्देशन दिइरहे पनि कहीँ कतै सरकारमा जाने बाटो छ कि भनेर खोजी भैरहेको छ । 

कांग्रेस संसदीय दलको बैठकमा सभापति देउवाले पार्टीका नवनिर्वाचित सांसदहरूलाई निर्देशन दिँदा उनले यो सरकारलाई विश्वासको मत दिने नदिने विषयमा केही बताएनन् । 

शनिबार दिउँसो सिंहदरबारस्थित कांग्रेस संसदीय दलको कार्यालयमा बसेको बैठक सम्पन्न भएको बैठकमा अर्को बैठक २६ गते बिहान ९ बजे बस्ने र उक्त बैठकले सरकारलाई विश्वासको मत दिने कि नदिने भन्ने विषयमा निर्णय गर्ने बताइएको छ ।

संसदमा सबैभन्दा ठूलो दल भएको छ । अहिले कांग्रेसको ८९ सिट रहे पनि सरकार बाहिर बसिरहेको अवस्थामा विश्वासको मत दिए पनि नदिए पनि उसका लागि कुनै फरक पर्दैन । 

वामपन्थीहरुको सरकार बनिरहेको र त्यसमा माधवकुमार नेपाल समूह छुटेकाले त्यसबाटै छिर्के हान्न खोज्दा पनि कांग्रेसले तत्कालै विश्वासको मत दिनुपर्ने आवश्यकता देखिँदैन । 

तर पुरानो सहयात्री दल र सहकर्मी नेताले सरकारको नेतृत्व गरेका कारण कांग्रेसले संसदकै कुनै एक महत्वपूर्ण पद पाइहालिन्छ कि भन्ने लोभ राखेको कहीँ कतै आभाष हुन थालेको छ । 

कांग्रेसका कतिपय नेताहरुले २६ गतेअघि नै यो सरकार ढल्छ भन्ने अभिव्यक्ति दिइरहेका छन् । तर ढल्छ चाहिँ कसरी भन्ने केही बताएका छैनन् । तत्कालै ढल्ने आधार पनि देखिँदैन । यो कुरा कांग्रेसका राजनीतिक खेलाडीहरुले नबुझेका पनि होइनन् । तर पनि विश्वासको मत दिने कि नदिने भन्ने बारेमा कांग्रेसले किन २६ गते बिहानलाई कुरेको होला भन्ने प्रश्न उब्जिएको छ । 

नेकपा एमालेसँग गठबन्धन गरेर प्रधानमन्त्री पाएको नेकपा माओवादी केन्द्रले दुई वर्षपछि सभामुख पनि पाउने हल्ला चलिरहेको छ । तर अहिलेको अवस्थामा भने एमालेले राष्ट्रपति र सभामुख पाउने छ । साढे दुई वर्षपछि एमालेले प्रधानमन्त्री पाउने र त्यसको बदलामा माओवादीले सभामुख चलाउने भनिए पनि त्यो स्पष्ट हुन सकेको छैन । 

तर कांग्रेसका केही नेताहरुले यतिबेलै राष्ट्रिय सहमतिको सरकार भनेर सभामुखका लागि सत्ता घटकका नेताहरुसँग छलफल गरेको बुझिन आएको छ । ‘कांग्रेसका केही साथीहरुले सभामुखको प्रस्ताव गरिरहनु भएको छ, सभामुख दिएमा विश्वासको मत दिने संकेत गरिरहनु भएको छ’, माओवादीका एक पदाधिकारीले बताए ।

ती पदाधिकारीको भनाइ यदि सत्य हो भने कांग्रेस यतिबेला विपक्षीमा बस्नुको सट्टा फेरि पनि सत्तारोहणका लागि पहल त गर्दै छैन भन्ने आशंका देखिएको छ । विगतमा माओवादीसँगको सहकार्य कांग्रेसका लागि त्यति फलदायी बनेको छैन भन्ने तथ्यलाई बिर्सेर फेरि पनि सभामुख मागेर त्यससँग विश्वासको मत साट्नु आवश्यक नभएको कतिपय कांग्रेसका नेताहरुको भनाइ छ । 

माओवादीका एक पदाधिकारीले दिएको जानकारी अनुसार कांग्रेसका केही नेताहरुले सभामुखका लागि गरिएको कुराकानीको विषयमा एमालेले पनि सूचना पाइसकेको छ । 

त्यही सूचनाका आधारमा एमाले अध्यक्ष केपी शर्मा ओलीले शनिबार दिउँँसो कांग्रेसले पाँच वर्षसम्म सत्ताको लागि च्याँखे नथापेकै राम्रो भन्ने अभिव्यक्ति दिएका थिए । 

उनले शनिबार दिउँसो यो सरकार ढले पनि संविधानको धारा ७६ (३) अनुसार अर्को सरकार बन्ने भएकाले प्रधानमन्त्री पद हावादारी गफ मात्रै भएको र कांग्रेसले भित्रभित्रै अरुनै चाल चलेको भनेर त्यही सभामुख पदप्रति लक्षित गरी आफ्नो अभिव्यक्ति दिएका थिए ।

 ‘अहिले पनि हामीभित्रको अन्तर विरोधमा खोल्न पायो भने सरकारको नेतृत्व पाउँछ । त्यस्तो भएन भने ७६ (४) नभए ७६ (५) मा जान्छ,’ ओलीले भने ‘अहिलेको राजनीति गरिरहेको व्यक्ति संविधानको धारा नपढेको र नबुझेको अध्यक्ष वा सभापति छैनन् । कांग्रेसले हामीलाई थाङ्नामा सुताउछ खोज्छ । आउन यहाँ बसौं छलफल गरौं ५ बजाऔं अनि प्रधानमन्त्री बनाउँला भनेर छक्काउन खोज्छ भने सबैतिर उसको धन्धा त्यही हो ।’ 

ओलीको यो अभिव्यक्तिले पनि तत्कालै कांग्रेसले केही प्राप्ति गर्ने अवस्था देखिँदैन । तैपनि नेता रामचन्द्र पौडेलले राष्ट्रिय सहमतिको सरकार बन्नुपर्ने अभिव्यक्ति दिएकाले यदि त्यस्तो सरकार बन्ने अवस्था आएमा सभामुख कांग्रेसले पाउन पनि सक्न नपाउन पनि सक्छ । 

कांग्रेस संसदीय दलको बैठक सकिने बित्तिकै महामन्त्री गगनकुमार थापाले अहिलेको सरकारले विश्वासको मत नपाउने बताइसकेका छन् । तर सभापति देउवाले शनिबार बिहानै विश्वासको मत दिने नदिने विषयमा निर्णय गर्ने बताउँदा पनि अर्का महामन्त्री विश्वप्रकाश शर्मा भने यो सरकारप्रति मौन रहेका छन् ।