मरुभूमिको यो होटेलमा हुँदैछ सिद्धार्थ र कियाराको विवाह

हाम्रा कुरा

प्रकाशित २०७९ पुष २४ आइतबार

काठमाडौं । बलिउड अभिनेता सिद्धार्थ मल्होत्रा र कियारा आडवाणी विवाह बन्धनमा बाँधिँदै छन् । दुवैले विवाहका लागि राजस्थानको मरुभूमिमा बलौटे किनारमा बनेको सूर्यगढ प्यालेस रोजेका छन् ।

यो स्टार जोडीको प्रि-वेडिङ समारोह फेब्रुअरी ४ र ५ मा हुनेछ । जसमा भारत तथा विदेशबाट आउने विशेष अतिथिहरूका बीचमा मेहेन्दी, हल्दी र सङ्गीत समारोह हुनेछ । जबकि फेब्रुअरी ६ मा दुवैले ब्याण्ड बाजा र जन्तीसहित मण्डपमा सात परिक्रमा गर्नेछन् । करिब ४ वर्षको सम्बन्धपछि दुवैले विवाह गर्ने निर्णय गरेका छन् ।

सूर्यगढ प्यालेस एक प्रसिद्ध गन्तव्य विवाह स्थल र हेरिटेज लुकमा बनेको लक्जरी होटेल हो। यो लगभग ६५ एकड क्षेत्रफलमा फैलिएको छ। होटेलमा दुई ठुला ताल बगैँचा साइटहरू र भोज सुविधाहरू छन्। यससँगै विवाह समारोहका लागि बावडी नामक ठाउँमा मण्डप सजाइनेछ । होटेलमा पाँच वटा हवेली, भिला र ९४ वटाभन्दा बढी कोठाहरू विवाहका लागि बुक गरिएका छन्।

होटेलको आँगनमा सङ्गीत, मेहन्दी र हल्दीको संस्कार सम्पन्न हुनेछ । मरुभूमिमा पाहुनाहरूको लागि रात्रि भोजको पनि व्यवस्था गरिनेछ। । हाउस फुल ४ र रेस ३ जस्ता फिल्म पनि यहाँ छायाङ्कन भएका छन् ।

फिल्म ‘शेर शाह’ मा सिद्धार्थ मल्होत्रा र कियारा आडवाणीले सँगै स्क्रिन सेयर गरेका थिए । यो फिल्मपछि सिद्धार्थ र कियाराको डेटिङको खबर बाहिर आएको थियो ।