काठमाडौं। प्रधानमन्त्री पुष्पकमल दहालको क्याबिनेटमा श्रम, रोजगार तथा सामाजिक सुरक्षा मन्त्री डोलप्रसाद अर्यालले आफूले भनेको काम गर्न नसके कुर्सी खाली गरिदिने वाचा र चुनौती दिएका छन्।

आफ्नो पालोमा ऐतिहासिक कामहरू हुने उनले वाचा गरेका छन्। ती कामहरू कति समयमा र कस्ता प्रकृतिका हुने भन्ने बारे श्रममन्त्री अर्यालले केही लेखेका छैनन्।

उनी म्यानपावर व्यवसायमा जोडिएको र श्रममन्त्री हुँदा 'स्वार्थको द्वन्द्व' भयो भनेर विभिन्न सञ्चार माध्यमहरूमा समाचार आएका छन्। ती समाचारहरूलाई उत्तर दिने क्रममा उनले फेसबुकमा लामो स्ट्याटस लेखेर आफूलाई स्पष्ट पार्ने प्रयास गरेका छन्। 

उनले आफूलाई आफ्नो पदको गरिमा र मर्यादा थाहा छ भन्दै गर्दा नेपाली प्रेसलाई आफ्नो गरिमा र मर्यादामा बस्न सम्झाएका छन्। उनले भनेका छन् 'म यो पदको मर्यादा र गरिमा जान्दछु । समाचार बनाउनेहरूले पनि आफ्नो पेशाको मर्यादा र गरिमा राखिदिउन्। नेपालको प्रेस ले पेल्यो भने त मान्छेको तेल निस्किन्छ भन्छन्। बाइ द वे म तेल उद्योगमा पनि संलग्न थिए। खैर जे होस्, मलाई प्रेस जगत सँग सवाल जवाफ गर्नु छैन, काम गर्नु छ।'

प्रेससँग सवाल जवाफ गर्नु छैन भन्दै उनले प्रेस प्रति असहिष्णु हुने तर्फ ईंगित गरेका छन्। प्रेससँग सवाल जवाफ गर्दिन भनेको प्रश्नहरूसँग भाग्नु हो र लोकतान्त्रिक व्यवस्थामा जनताको कर तलब र सुविधाका रूपमा खाने मन्त्रीले प्रश्नहरूको उत्तर दिन्न भन्नु व्यवस्थाका लागि खतराको सङ्केत हो । 

मन्त्री अर्यालको फेसबुक स्ट्याटस जस्ताको तस्तै : 

'म यो देशको सामान्य नागरिक।  अवसर खोज्दै संघर्ष गर्दै १५ वटा भन्दा बढि पेशा र ब्यवशायमा लड्दै, उठ्दै,आबद्द,संलग्न ,सक्रिय, निष्क्रिय हुँदै यहाँ आइपुगेको आम मान्छे हु। म गाँउको सामान्य परिवारको मान्छे। थोरै थोरै धेरै क्षेत्रमा लगानी र परिश्रम गरेर म जस्तै मेहनती साथीहरूको  सामुहिक संलग्नतामा धेरै क्षेत्रमा हात हालेर आफ्नो र धेरैको परिवार पाल्ने काम गरेको मान्छे।देशका हरेक क्षेत्रका उद्योग ब्यवसायमा थोरै थोरै संलग्नता भएकाले मेरो स्वार्थ नबझिने त कुनै क्षेत्र नै छैन। एक्लै कुनै ब्यवसायमा लगानी गर्ने मेरो आर्थिक हैसियत हिजो पनि थिएन र अझैपनि छैन। म कृषि फार्ममा  छु, ट्राभल सर्भिसमा छु,सहकारीमा छु, इटा उध्योगमा छु, नेपाली सामानको उत्पादनमा छु, नेपालको पहिलो रेमिटेन्स कम्पनीमा छु, एजुकेश कन्सटेन्सीमा छु, सेक्युरिटी सर्भिसमा छु, ट्रेकिङ सर्भिसमा छु, होटल ब्यवशायमा छु, क्याटरिङ ब्यवशायमा छु, यस्ता थुप्रै क्षेत्रमा छु। गरि खाने मान्छे हुँ, थोरै थोरै धेरैमा छु।तर म्यानपावर कम्पनीमा म कहिले पनि छैन। हो, साथीहरुले एउटा कम्पनीमा सल्लाहकारमा राख्यौ है भनेर  "इन्टर्नेशनल मार्केटिङ डाइरेक्टर" को पद लेखिदिए तर हटाईदिन भुले । तर त्यो वा कुनै मेन पावर कम्पनीमा न मेरो लगानी छ, न संलग्नता, न शेयर न स्यालरी। समाचार बनाउनेहरूले नै भन्दिनुस् न त मेरो कुन म्यानपावरमा कहिले कति शेयर थियो? मैले कुनै गलत काम गरेर एक पैसापनि आर्जन गरेको छैन। राजनीतिमा संलग्न भए पछि त झन कतै पनि प्रत्यक्ष आवद्ध छैन। वेबसाईटहरु अपडेटेड नहुनुले मेरो संलग्नता प्रमाणीत गर्दैनन्। तैपनि मेरो चुनौती छ, ल भन्नुस म बाट कहिले कुन कुन गैरकानुनी काम भयो? मन्त्रीका रुपमा काम गर्न जादा आफूले जानेकै क्षेत्रमा जाने हो र श्रम रोजगार मन्त्रालय मैले धेर थोर जानेको विषयको मन्त्रालय मध्य एक हो। म बाट पीडित एक जना मात्र भए खडा गरिदिनु होला, मैले कुनै गैर कानुनी काम गरेको भए जानकारी गराउनु होला। म यो पदको मर्यादा र गरिमा जान्दछु । समाचार बनाउनेहरूले पनि आफ्नो पेशाको मर्यादा र गरिमा राखिदिउन्। नेपालको प्रेस ले पेल्यो भने त मान्छेको तेल निस्किन्छ भन्छन्। बाइ द वे म तेल उद्योगमा पनि संलग्न थिए। खैर जे होस्, मलाई प्रेस जगत सँग सवाल जवाफ गर्नु छैन, काम गर्नु छ। र  मेरो अन्तिम अनुरोध, मेरो कार्यकालमा  ऐतिहासिक कामहरू हुने छ्न्। कृपया  अहिले जस्तै तपाईहरुका सञ्चार माध्यमको स्पेस ती कामहरुका लागि पनि खाली राखिरहनु होला। भनेका कुरा पूरा गरिन भने म कुर्सी खाली गरिदिउँला। यो मेरो वाचा र चुनौती भयो।यो लामो स्प्स्टोक्ति बाट  आफूलाई स्वाद लागेको हेडलाईन हालेर "पेल्ने" अधिकार याहाहरुलाई नै  दिन्छु । म आफ्ना पक्षमा समाचार बनोस् भन्ने आशले होइन जनताको पक्षमा काम गर्न सकियोस् भन्ने आशयले काममा छु।   हस्  अब अब काममा लाग्छु।'