काठमाडौं। चिनियाँ विदेशमन्त्री एवं गत महिना चिनियाँ राष्ट्रपति सी चिनफिङको शीर्ष विदेश नीति सल्लाहकारमासमेत नियुक्त भएका कूटनीतिज्ञ वाङ यीले यसै हप्ता मास्कोको भ्रमण गर्ने भएका छन् ।
यो भ्रमण युक्रेनमा रुसले 'विशेष सैन्य अभियान'को शुरुआत गरेको एक वर्ष हुन लाग्दा भइरहेको हो । वाशिंगटन डीसीमा पूर्व चिनियाँ राजदूतको रूपमा संयुक्त राज्य अमेरिकाको शक्ति बुझेका वाङ यीको मास्को भ्रमण उनको आठ दिने युरोप भ्रमणको अन्तिम विन्दु हुनेछ।
क्रेमलिनले फेब्रुअरी २० मा वाङ र रुसी नेता भ्लादिमिर पुटिनबीचको भेटलाई नकार्न नसक्ने भनेको छ। वाङ यी र भ्लादिमिर पुटिनबीचको भेट महत्वपूर्ण हुने ठानिएको छ।
यसैबीच अमेरिका र युरोपका देशहरूले युक्रेनलाई बढ्दो सैन्य सहायताको साथ आफ्नो समर्थन जारी राखेका छन्। बेइजिङले मास्कोसँग आफ्नो पङ्क्तिबद्धता जारी राखेको छ।
शनिबारको म्युनिख सुरक्षा सम्मेलनमा वाङले शान्तिप्रति चीनको प्रतिबद्धतालाई जोड दिएका थिए। 'हामी आगोमा इन्धन थप्दैनौं र हामी यस संकटबाट लाभ उठाउनेविरुद्ध छौं,' वाङले अमेरिकालाई लक्षित गर्दै भनेका थिए ।
'केही शक्तिहरू शान्ति वार्तालाई सफल भएको हेर्न चाहँदैनन् । उनीहरूलाई युक्रेनीहरूको जीवन र मृत्युको वास्ता छैन न त युरोपमा हुने हानिको। उनीहरूसँग युक्रेनभन्दा ठूलो रणनीतिक लक्ष्यहरू हुन सक्छन्। यो युद्ध जारी रहनु हुँदैन,' वाङले भनेका थिए।
चीनले रुसलाई शान्ति वार्ताका लागि आग्रह गर्दै आएको छ।
