काठमाडौं । आईसीसी यू–१९ पुरुष विश्वकप क्रिकेटको एसिया छनोट प्रतियोगितामा नेपालले लगातार दोस्रो जित हासिल गरेको छ । पहिलो खेलमा शुक्रबार सिंगापुरलाई हराएको नेपालले शनिबार भएको दोस्रो खेलमा कुवेतलाई २४३ रनको फराकिलो अन्तरले पराजित गरेको हो ।
यूएईस्थित मलिका क्रिकेट मैदानमा नेपालले दिएको ३४४ रनको लक्ष्य पछ्याएको कुवेतले ३०.५ ओभरमा अलआउट हुँदै १०० रन मात्र बनायो । कुवेतका लागि जुधा सालधानाले सर्वाधिक २६ रन बनाए ।
नेपालका लागि आकाश चन्दले ६ तथा हेमन्त धामी र दिपेश कंडेलले समान २–२ विकेट लिए ।
त्यसअघि पहिले ब्याटिङ गरेको नेपालले ५० ओभरमा ७ विकेट गुमाएर ३४३ रन बनायो । ओपनर अर्जुन कुमाल र कप्तान देव खनालले सानदार शतक बनाए ।
खनालले ११७ बलमा ९ चौका र ३ छक्काको सहयोगमा १२५ रन बनाए । कुमालले ११२ बलमा १२ चौकाको सहयोगमा १०८ रन बनाए । कुमाल र खनालबीच तेस्रो विकेटका लागि १७० रनको साझेदारी भएको थियो ।
प्रतियोगितामा आयोजक यूएई र नेपालसहित सिंगापुर, कुबेत,हङकङ र मलेसियाको सहभागिता रहेको छ ।
राउण्ड रोबिनका आधारमा हुने प्रतियोगिताको शीर्ष टोली २०२४ मा श्रीलंकामा हुने यू–१९ विश्वकपका लागि छनोट हुनेछ।
नेपालले अब सोमबार तेस्रो खेलमा हङकङविरुद्ध खेल्नेछ।
