- सुन चाँदी दर
- विनिमय दर
- नेपाली पात्रो
- राशिफल
काठमाडौं। भोलि फागुन २५ गते राष्ट्रपतिको निर्वाचन हुँदै छ। नयाँ राष्ट्रपति पदका लागि नेपाली कांग्रेसका वरिष्ठ नेता रामचन्द्र पौडेल र नेकपा (एमाले)का तर्फबाट उपाध्यक्ष सुवासचन्द्र नेम्वाङ उम्मेदवार छन् ।
वरिष्ठ नेता पौडेल नौ दलीय गठबन्धनका तर्फबाट साझा उम्मेदवार रहेका छन् । बानेश्वरस्थित संसद् भवनको ल्होत्से हलमा राष्ट्रपति निर्वाचन हुनेछ ।
ल्होत्से हलमा निर्वाचनका लागि दुई वटा निर्वाचन केन्द्र निर्माण गरिएको छ ।
निर्वाचनलाई स्वच्छ, स्वतन्त्र, निष्पक्ष र व्यवस्थित तुल्याउन सङ्घीय सांसद र प्रदेशसभा सदस्यका लागि मतदान गर्न बेग्ला–बेग्लै मतदान केन्द्रको व्यवस्था गरिएको हो ।
राष्ट्रपति निर्वाचनमा सङ्घीय संसद्का तीन सय ३२ र प्रदेशसभा सदस्य पाँच सय ५० मतदाता छन् ।
निर्वाचनमा सङ्घीय सांसदको एकमत बराबर ७९ र प्रदेशसभा सदस्यको एक मत बराबर ४८ मत भार कायम गरिएको छ ।
निर्वाचनका लागि सङ्घीय सांसदको मतदान केन्द्रमा उच्च अदालत पाटनका उपरजिष्ट्रार केशव पौडेल र प्रदेशसभा सदस्यको मतदान केन्द्रमा सर्वोच्च अदालतका उपरजिष्ट्रार लोकनाथ पराजुली खटिएका छन् ।
आठ दलले निर्वाचनको तयारीका लागि आफ्ना प्रतिनिधि सभा र राष्ट्रिय सभाका सांसद तथा सबै प्रदेश सभा सदस्यलाई आज बिहान ११ बजेसम्म काठमाडौं आइपुग्न निर्देशन दिएको छ ।