काठमाडौं । आईसीसी विश्वकप लिग २ अन्तर्गत राजधानीमा जारी त्रिकोणात्मक एक दिवसीय क्रिकेट श्रृंखलामा यूएई विरुद्धको खेलमा नेपालले जितका लागि यूएईलाई २४९ रनको चुनौती दिएको छ ।
त्रिभुवन विश्वविद्यालयको मैदान कीर्तिपुरमा नेपालले टस जितेर पहिले ब्याटिङ गर्दै ४९.२ ओभरमा अलआउट हुँदै २४८ रन बनायो । कप्तान रोहितकुमार पौडेलले अर्धशतक पूरा गरे । उनले कप्तानी इनिङ्स खेल्ने क्रममा ११२ बलमा ७७ रन बनाए ।
२२ रन जोड्दा शुरुआती ३ विकेट गुमाएको नेपालका लागि रोहितले कप्तानी इनिङ्स खेलेका हुन् । उनले नेपालका लागि ४२ एक दिवसीय अन्तर्राष्ट्रियमा आठौं अर्धशतक बनाएका हुन् ।
रोहितको नाममा एउटा शतकसमेत रहेको छ ।
त्यसैगरी नेपालका लागि आरिफ शेखले ४३, गुलशन झाले ३२ बलमा ३७ तथा दिपेन्द्र सिंह ऐरीले १९ बलमा ३४ रन बनाए । भीम सार्कीले २९ रन बनाए । त्यसबाहेक कुनै पनि ब्याट्सम्यानले दोहोरो स्कोर बनाउन सकेनन् ।
यूएईका चार खेलाडीले २–२ तथा दुई खेलाडीले १–१ विकेट लिए ।
आजको खेलमा करण केसी र ज्ञानेन्द्र मल्ल टिमबाट बाहिरिँदा स्पिनर ललितनारायण राजवंशी र अलराउण्डर गुलशन झा टिममा समावेश भएका छन् ।
नेपालले एक दिवसीय मान्यतालाई कायम राख्न आजको खेल जिते पुग्नेछ । यो खेल हारे यूएईको एक दिवसीय मान्यता सन्कटोन्मुख हुनेछ ।
नेपालले यूएईलाई पछिल्लो भिडन्तमा ४२ रनले हराएको थियो । तर त्यसअघिको खेलमा ६८ रनले पराजित भएको थियो । त्यसअघिका दुई खेल भने नेपालले नै जितेको थियो ।
नेपाल खेल्न बाँकी तीन वटै खेल जितेर सिधै विश्वकप छनोट खेल्न चाहन्छ भने यूएई विश्वकपमा सिधै छनोटको सम्भावनाबाट बाहिरिइसकेको छ ।
यसअघिको खेलमा नेपालले त्रिकोणात्मक श्रृंखलाको अर्को राष्ट्र पपुवा न्युगिनी पीएनजीलाई हराएको थियो भने यूएई पीएनजीसँग पराजित भएको थियो ।
यसबाट पनि नेपालको मनोबल उच्च छ भने यूएई निकै दबाबमा छ । अर्कातर्फ घरेलु मैदानमा खेलिरहेको नेपाललाई १२ औं खेलाडी मानिने दर्शकको समर्थन छ भने यूएई यो मामलामा कमजोर छ ।
नेपाल निरन्तर सफलतालाई अझ अगाडि बढाउने क्रममा आजको खेल जित्नैपर्ने दबाबमासमेत छ ।
अंक तालिका
सात टोली सहभागी विश्वकप लिग २ मा जारी श्रृंखलाका खेल बाहेक सबैले खेलिसकेका छन् । एक टिमले ३६ खेल खेल्नुपर्नेमा सबै अगाडिका चार टिमले पूरा खेल खेलिसकेका छन् । पछाडिका तीन टिमको भिडन्त जारी छ ।
स्कटल्याण्ड ५० अंकसहित च्याम्पियन भइसकेको छ । ओमान ४४ अंकबाट दोस्रो स्थानमा छ । तेस्रो स्थानको नामिबियाको ३९ अंक छ । चौथो स्थानको अमेरिकाको ३५ अंक छ ।
३३ खेलबाट ३४ अंकको नेपाल पाँचौं स्थानमा छ । ३३ खेलबाट ३१ अंकको यूएई छैटौं स्थानमा छ । ३४ खेलबाट ११ अंकको पीएनजी पुछारमा छ ।
नेपाल बाँकी तीन खेल जितेमा ४० अंकसहित तेस्रो स्थानमा पुग्नेछ । यूएईले बाँकी खेल जिते पनि चौथो स्थानमै रहने छ ।
सातमध्ये शीर्ष तीनमा रहने टिमले सिधै विश्वकप छनोट खेल्न पाउने छन् । शीर्ष पाँच टिमको एक दिवसीय वरियता कायम रहने छ । पुछारका दुई टिमले एक दिवसीय मान्यता गुमाउने छन् ।
अहिलेसम्म पीएनजीले एक दिवसीय मान्यता गुमाएको छ भने नेपाल र यूएईमध्ये एक टिमले उक्त मान्यता गुमाउने छन् ।
आजको खेलमा नेपाल विजयी हुनासाथ यूएईले एक दिवसीय मान्यता गुमाउने लगभग निश्चित हुनेछ । यूएईले यो खेल जिते पनि त्यसपछिका दुवै खेल जित्नुपर्ने हुन्छ । तर आजको खेलमा नेपाल पराजित भए सिधै विश्वकप छनोट खेल्ने सम्भावना सकिने छ ।
निकै महत्वपूर्ण खेलमा नेपाल र यूएई मैदानमा उत्रदै छन् ।
बाँकी खेलहरु–
नेपाल र पीएनजी, सोमबार ।
यूएई र पीएनजी बुधबार ।
नेपाल र यूएई बिहीबार ।
