-
-
-
-
काठमाडौं । बैतडीको पाटन नगरपालिका ८ मा जिप दुर्घटना हुँदा ६ जनाको घटनास्थलमै मृत्यु भएको छ । बैतडीको झुलाघाटबाट बझाङको बाग्थलातर्फ जाँदै गरेको से १ ज ७६४ नम्बरको जिप दुर्घटनामा परेको हो । दुर्घटनामा परी बझाङको एकै गाउँका छ जनाको ज्यान गएको छ ।
मृत्यु हुनेमा बझाङको केदारस्युँ गाउँपालिका ५ बाँझ गाउँका ६० वर्षीय मने बोहरा, सोही ठाउँका ४२ वर्षीय नरे बोहरा, ३५ वर्षीय गोरख बोहरा, ४५ वर्षीय मानबहादुर धामी, ४५ वर्षीय बिर्ख धामी र ४० वर्षीय बिरे धामी रहेका छन् ।
मृतक सबै एकै गाउँका हुन् । मंगलबार राति ११ बजेतिर दुर्घटना भएको थियो । जिप सडकबाट करिब ५ सय मिटर तल खसेको थियो । जिपका चालक फरार छन् । जिपमा सवार अन्य पाँच जनाले हाम फालेर ज्यान जोगाएका छन् ।
मृतकहरू भारतको पिथौरागढबाट विसु पर्व मनाउन घर फर्किने क्रममा दुर्घटनामा परेको बताइएको छ । घटनाबारे जिल्ला प्रहरी कार्यालय बैतडीले अनुसन्धान थालेको छ ।
