पोखरा । गण्डकी प्रदेशमा एमाले नेतृत्वको सरकार ढलेको छ । मुख्यमन्त्री खगराज अधिकारीले प्रदेश सभा बैठकमा पेस गरेको विश्वासको मतको प्रस्ताव बहुमतले अस्वीकार भएको छ ।
उनको प्रस्तावको पक्षमा २४ र विपक्षमा ३५ मत परेको छ । अधिकारीलाई एमालेको २२ र राप्रपाका २ सांसदले मत दिएका हुन् । नेपाली कांग्रेसका २७, माओवादी केन्द्रका ७ र स्वतन्त्र सांसदले विपक्षमा मत दिएका थिए ।
६० सदस्यीय प्रदेश सभामा सरकार बन्न ३१ मतको आवश्यक पर्दछ । एमाले संसदीय दलका नेता अधिकारीले माओवादी केन्द्र र राप्रपाको समर्थनमा गत पुस २५ मा मुख्यमन्त्रीमा नियुक्त भइ पुस २९ मा विश्वासको मतसमेत लिएका थिए ।
माओवादी केन्द्रले चैत १० मा सरकारलाई दिएको समर्थन फिर्तासहित मन्त्रीले राजीनामा दिएपछि अधिकारी सरकार अल्पमतमा परेको थियो ।
संवैधानिक व्यवस्था अनुसार मुख्यमन्त्री अधिकारीले ३० दिनभित्र विश्वासको मत लिनुपर्ने भएकाले शनिबार लिएका हुन् । उनले शुक्रबार मात्रै सरकारले गरेका १०० दिनका उपलब्धि सार्वजनिक गरेका थिए ।
