पोखरा । नेपाली कांग्रेसका केन्द्रीय सदस्य गुरु बरालले चिनियाँ विस्तारवाद नरोकिएसम्म नेपालको विकास सम्भव नहुने बताउनु भएको छ ।
आइतबार पोखरामा राष्ट्रिय एकता अभियानले आयोजना गरेको 'नेपालप्रति चिनियाँ अभ्यास र असर' विषयक विचार-गोष्ठीमा बोल्दै उनले चीनले पछिल्लो समय नेपालमाथि विभिन्न कोणबाट आँखा लगाइरहेको टिप्पणी गरे ।
उनले भने,'कहिले चीनका लागि नेपाली राजदूतको ओहोदाको प्रमाण पत्र नबुझिदिने त कहिले काठमाडाैंमा रहेको चिनियाँ दूतावासमार्फत चीनले नेपालको आन्तरिक राजनीतिमा हस्तक्षेप गर्न लगायतको काम गरिरहेको छ।'
उनले चीनको विस्तारवादी नीतिलाई हामी सबै जना मिलेर नरोकेसम्म नेपालको विकास सम्भव नहुने दोहर्याए । त्यस्तै गोष्ठीमा सहभागी पूर्वमन्त्री मेखलाल श्रेष्ठले नेपाललाई श्रीलङ्का बनाउने रणनीतिमा चीन लागेको आरोप लगाए।
उनले भने,'चीनले नेपाललाई श्रीलङ्का बनाउनु खोजिरहेको छ, चीनले पोखरा विमानस्थलमा लगानी गरेर विमानस्थल कब्जामा लिने षडयन्त्र गरिरहेको छ।'
त्यसैगरी समाजसेवी आनन्द राज मुलमीले चीनको विस्तारवादी नीतिविरुद्ध सबै जना एक जुट हुनुपर्नेमा जोड दिनुभयो । उनले चीनले बीआरआईमार्फत नेपाललाई ऋण जालमा पार्न विभिन्न कोणबाट कसरत गरिरहेको आरोप लगाए। उनले भने,'चीनको विस्तारवादी नीतिलाई रोक्नु पर्छ, नेपाललाई चिनियाँ ऋणको जालमा फस्न दिनु हुँदैन।'
अभियानका केन्द्रीय अध्यक्ष विनय यादवले चीनले पछिल्लो समय नेपालको भूभाग पनि मिचेको समाचार पत्र पत्रिकामा पढिरहेको बताए । उनले चिनियाँ नागरिक नेपालमा अवैध काम गर्ने बढ्दा देशकाे सुरक्षा नै खतरामा परेको बताए ।
कार्यक्रमको सहजीकरण समाजसेवी एवं नेपाली कांग्रेस स्याङ्जाका पूर्व सभापति बुद्धि रानाले गरेका थिए। हिन्दु स्वयमसेवक सङ्घका व्यवस्था प्रमुख अनिल गुप्ता तथा हरिहरनाथ मुक्तिनाथ यात्राका प्रभारी अनुप कुमार अतिथिको रूपमा उपस्थित रहेका थिए ।
