काठमाडौं । कोरोना भाइरसबाट बिहीबार थप एक जनाको मृत्यु भएको छ । स्वास्थ्य तथा स्वास्थ्य तथा जनसंख्या मन्त्रालयका अनुसार थप एक जनाको मृत्यु भएको हो ।
योसँगै कोरोनाबाट मृत्यु हुनेको संख्या १२ हजार २९ पुगेको छ । त्यस्तै १११ संक्रमित थपिएका छन् । १ हजार ४० जनाको पीसीआर परीक्षणबाट ७८ तथा १ हजार ४७७ जनाको एन्टिजेन परीक्षणबाट ३३ संक्रमित थपिएका हुन् ।
यसअघि गत साताको मंगलबार मात्रै गत वर्षदेखिकै उच्च १७१ संक्रमित थपिएका थिए ।
हाल सक्रिय संक्रमित पीसीआर परीक्षणबाट बढेर ३७८ पुगेका छन् । जसमा काठमाडौं उपत्यकामा १८ जना संस्थागत आइसोलेसनमा, ६ जना आईसीयूमा तथा १ जनाको भेन्टिलेटरमा उपचार भइरहेको छ ।
जसमा वीर अस्पतालको एचडीयूमा ८ जना आईसीयूमा २ जना तथा भेन्टिलेटरमा १ जना रहेका छन् । शुक्रराज ट्रपिकल तथा सरुवा रोग अस्पतालमा १ जना एचडीयूमा र ४ जना आईसीयूमा रहेका छन् । उपत्यका बाहिरको विवरण भने मन्त्रालयले दिएको छैन ।
६० जनामात्र संक्रमणमुक्त भएका छन् । खोप लगाउनेको संख्या १३ हजार ९८७ रहेको छ । मन्त्रालयले प्रक्रिया पुगेका सबैलाई खोप लगाउन आग्रह गरिरहेको छ ।
बेवास्ता नै बढी
नेपालमा कोरोना भाइरसको महामारी द्रूत गतिमा बढिरहेको छ । सात किसिमका ओमिक्रोनका भेरियन्ट अहिले फेलिएका छन् । त्यतिमात्र हैन भारतमा द्रूत गतिमा फैलिएको नयाँ भेरियन्ट एक्सबीएफसमेत नेपालमा देखिइसकेको छ ।
तर सावधानी कमैलेमात्र अपनाएका छन् । परीक्षण गराउन जाने पनि निकै नै कम छन् । घरदेखि अस्पतालसम्म र सार्वजनिक यातायातदेखि कार्यालयसम्म कसैले पनि कोभिड प्रोटोकल लागू गरेको पाइँदैन ।
त्यतिमात्र हैन मास्कसमेत लगाएको पाइँदैन । कोरोना फैलिने सबैभन्दा खतरा अस्पतालमै हुने भए पनि अस्पतालमासमेत बिना मास्क बिरामीदेखि चिकित्सकसम्म हिँडिरहेका छन् ।
स्वास्थ्य तथा जनसंख्या मन्त्रालयलेसमेत पटकपटक सावधानी अपनाउन भन्दै औपचारिक रुपमा सन्देश दिए पनि सरकारले नै सुनेको छैन । पूर्वतयारीसमेत गरिएको छैन ।
