कोरोनाका १९ संक्रमित थपिए, उपत्यकामा अस्पताल भर्ना हुने बढे

हाम्रा कुरा

प्रकाशित २०८० वैशाख १८ सोमबार

काठमाडौं । कोरोना भाइरसका १९ संक्रमित थपिएका छन् । स्वास्थ्य तथा जनसंख्या मन्त्रालयका अनुसार ३७५ जनाको पीसीआर परीक्षणबाट १९ जना संक्रमित पाइएका हुन् । एन्टिजेन परीक्षणको रिपोर्ट भने मन्त्रालयसँग छैन ।

हाल सक्रिय संक्रमित पीसीआर परीक्षणबाट २८३ जना रहेका छन् । जसमा काठमाडौं उपत्यकामा ३२ जना संस्थागत आइसोलेसनमा, ११ जना आईसीयूमा तथा १ जनाको भेन्टिलेटरमा उपचार भइरहेको छ ।

उपत्यकामा संक्रमितहरु अस्पताल भर्ना हुनेको संख्या बढेको छ । जसमा वीर अस्पतालको एचडीयूमा ९ जना आईसीयूमा ३ जना तथा भेन्टिलेटरमा १ जना रहेका छन् । शुक्रराज ट्रपिकल तथा सरुवा रोग अस्पतालमा १ जना एचडीयूमा र ६ जना आईसीयूमा रहेका छन् ।

वीरेन्द्र अस्पताल छाउनीको जनरलमा १ जना रहेका छन् । त्यस्तै ग्रान्डी अस्पतालमा १ जना जनरलमा रहेका छन् ।

उपत्यका बाहिरको विवरण भने मन्त्रालयले दिएको छैन ।

६४ जना संक्रमणमुक्त भएका छन् । खोप लगाउनेको संख्या २९ हजार ३९९ रहेको छ । मन्त्रालयले प्रक्रिया पुगेका सबैलाई खोप लगाउन आग्रह गरिरहेको छ ।

कोरोनाबाट अहिलेसम्म १२ हजार ३० जनाको मृत्यु भइसकेको छ ।

बेवास्ता नै बढी
नेपालमा कोरोना भाइरसको महामारी द्रूत गतिमा बढिरहेको छ । सात किसिमका ओमिक्रोनका भेरियन्ट अहिले फेलिएका छन् । त्यतिमात्र हैन भारतमा द्रूत गतिमा फैलिएको नयाँ भेरियन्ट एक्सबीएफसमेत नेपालमा देखिइसकेको छ ।

तर सावधानी कमैलेमात्र अपनाएका छन् । परीक्षण गराउन जाने पनि निकै नै कम छन् । घरदेखि अस्पतालसम्म र सार्वजनिक यातायातदेखि कार्यालयसम्म कसैले पनि कोभिड प्रोटोकल लागू गरेको पाइँदैन ।

त्यतिमात्र हैन मास्कसमेत लगाएको पाइँदैन । कोरोना फैलिने सबैभन्दा खतरा अस्पतालमै हुने भए पनि अस्पतालमासमेत बिना मास्क बिरामीदेखि चिकित्सकसम्म हिँडिरहेका छन् ।

स्वास्थ्य तथा जनसंख्या मन्त्रालयलेसमेत पटकपटक सावधानी अपनाउन भन्दै औपचारिक रुपमा सन्देश दिए पनि सरकारले नै सुनेको छैन । पूर्वतयारीसमेत गरिएको छैन ।