पीसीआर परीक्षणबाट १७ कोरोना संक्रमित थपिए, खोप लगाउने बढे

हाम्रा कुरा

प्रकाशित २०८० वैशाख २२ शुक्रबार

काठमाडौं । कोरोना भाइरसका १७ संक्रमित थपिएका छन् । स्वास्थ्य तथा जनसंख्या मन्त्रालयका अनुसार २५७ जनाको पीसीआर परीक्षणबाट १७ जना संक्रमित पाइएका हुन् । एन्टिजेन परीक्षणको रिपोर्ट भने मन्त्रालयले दिएको छैन ।

हाल सक्रिय संक्रमित पीसीआर परीक्षणबाट १६२ जना रहेका छन् । जसमा काठमाडौं उपत्यकामा २४ जना संस्थागत आइसोलेसनमा, १२ जना आईसीयूमा तथा ० जनाको भेन्टिलेटरमा उपचार भइरहेको छ ।

उपत्यकामा संक्रमितहरु अस्पताल भर्ना हुनेको संख्या बढेको छ । जसमा वीर अस्पतालको एचडीयूमा ३ जना र १ जना आईसीयूमा रहेका छन् । शुक्रराज ट्रपिकल तथा सरुवा रोग अस्पतालमा १ जना एचडीयूमा र ९ जना आईसीयूमा रहेका छन् ।

वीरेन्द्र अस्पताल छाउनीको जनरलमा १ जना रहेका छन् । उपत्यका बाहिरको विवरण भने मन्त्रालयले दिएको छैन ।

५७ जना संक्रमणमुक्त भएका छन् । ४३ हजार ६०९ जनाले खोप लगाएका छन् । मन्त्रालयले प्रक्रिया पुगेका सबैलाई खोप लगाउन आग्रह गरिरहेको छ ।

कोरोनाबाट अहिलेसम्म १२ हजार ३१ जनाको मृत्यु भइसकेको छ ।

बेवास्ता नै बढी
नेपालमा कोरोना भाइरसको महामारी द्रूत गतिमा बढिरहेको छ । सात किसिमका ओमिक्रोनका भेरियन्ट अहिले फेलिएका छन् । त्यतिमात्र हैन भारतमा द्रूत गतिमा फैलिएको नयाँ भेरियन्ट एक्सबीएफसमेत नेपालमा देखिइसकेको छ ।

तर सावधानी कमैलेमात्र अपनाएका छन् । परीक्षण गराउन जाने पनि निकै नै कम छन् । घरदेखि अस्पतालसम्म र सार्वजनिक यातायातदेखि कार्यालयसम्म कसैले पनि कोभिड प्रोटोकल लागू गरेको पाइँदैन ।

त्यतिमात्र हैन मास्कसमेत लगाएको पाइँदैन । कोरोना फैलिने सबैभन्दा खतरा अस्पतालमै हुने भए पनि अस्पतालमासमेत बिना मास्क बिरामीदेखि चिकित्सकसम्म हिँडिरहेका छन् ।

स्वास्थ्य तथा जनसंख्या मन्त्रालयलेसमेत पटकपटक सावधानी अपनाउन भन्दै औपचारिक रुपमा सन्देश दिए पनि सरकारले नै सुनेको छैन । पूर्वतयारीसमेत गरिएको छैन ।