काठमाडौं । नेपालमा कोरोना भाइरसका संक्रमित बढेका छन् । आइतबार ३२ संक्रमित थपिएकामा सोमबार बढेर ५७ पुगेका छन् ।
स्वास्थ्य तथा जनसंख्या मन्त्रालयका अनुसार पीसीआर परीक्षणबाट पाइएका संक्रमितहरु बढेका हुन् ।
७१६ जनाको पीसीआर परीक्षणबाट ४१ संक्रमित थपिएका हुन् । त्यस्तै १ हजार २१५ एन्टिजेन परीक्षणबाट १६ संक्रमित पाइएका छन् ।
योसँगै सक्रिय संक्रमित पीसीआर परीक्षणबाट बढेर १४७ पुगेका छन् । जसमा काठमाडौं उपत्यकामा २१ जना संस्थागत आइसोलेसनमा, ७ जना आईसीयूमा तथा १ जनाको भेन्टिलेटरमा उपचार भइरहेको छ ।
२७ जना संक्रमणमुक्त भएका छन् । १९ हजार ८१८ जनाले खोप लगाएका छन् । मन्त्रालयले प्रक्रिया पुगेका सबैलाई खोप लगाउन आग्रह गरिरहेको छ ।
कोरोनाबाट अहिलेसम्म १२ हजार ३१ जनाको मृत्यु भइसकेको छ ।
बेवास्ता नै बढी
नेपालमा कोरोना भाइरसको महामारी द्रूत गतिमा बढिरहेको छ । सात किसिमका ओमिक्रोनका भेरियन्ट अहिले फेलिएका छन् । त्यतिमात्र हैन भारतमा द्रूत गतिमा फैलिएको नयाँ भेरियन्ट एक्सबीएफसमेत नेपालमा देखिइसकेको छ ।
तर सावधानी कमैलेमात्र अपनाएका छन् । परीक्षण गराउन जाने पनि निकै नै कम छन् । घरदेखि अस्पतालसम्म र सार्वजनिक यातायातदेखि कार्यालयसम्म कसैले पनि कोभिड प्रोटोकल लागू गरेको पाइँदैन ।
त्यतिमात्र हैन मास्कसमेत लगाएको पाइँदैन । कोरोना फैलिने सबैभन्दा खतरा अस्पतालमै हुने भए पनि अस्पतालमासमेत बिना मास्क बिरामीदेखि चिकित्सकसम्म हिँडिरहेका छन् ।
स्वास्थ्य तथा जनसंख्या मन्त्रालयलेसमेत पटकपटक सावधानी अपनाउन भन्दै औपचारिक रुपमा सन्देश दिए पनि सरकारले नै सुनेको छैन । पूर्वतयारीसमेत गरिएको छैन ।
