काठमाडौं । नेकपा (एमाले)का महासचिव शङ्कर पोखरेलले भारतीय पक्षलाई नेपाल-भारत प्रबुद्ध व्यक्ति समूह (ईपीजी) प्रतिवेदन बुझ्न दबाब सिर्जना गर्नुपर्ने बताएका छन् । ‘प्रधानमन्त्रीको भारत भ्रमण र नेपालको राष्ट्रिय सरोकार’ विषयक छलफलमा उनले नेपाली जनता असहज ठानेका सन्धिलाई पुनरावलोकन गर्नुपर्ने भन्दै प्रतिवेदन बुझ्न दबाब सिर्जना गर्नुपर्ने बताएका हुन् ।
ईपीजी प्रतिवेदन नेपाल र भारत सम्बन्धको नयाँ आधार पत्र रहेको भन्दै ईपीजी बुझ्न जति ढिला हुन्छ, त्यति नै सम्बन्धमा असर पर्ने महासचिव पोखरेलको भनाइ थियो । “ईपीजीको प्रतिवेदन बुझ्ने र कार्यान्वयन गर्ने प्रक्रियामा नेपालको जोड हुनुपर्दछ । ईपीजी नेपाल हितको सर्वाधिक महत्त्व विषय हो । त्यसको आधारमा नयाँ सम्बन्ध बनाउने गर्नुपर्दछ”, उनले भने ।
जोसँग धेरै सम्बन्ध हुन्छ त्यहीसँग खटपट हुने गरेको उल्लेख गर्दै उनले खटपट धेरै भयो भने सम्बन्धलाई असर पार्ने तहमा पुग्ने हो कि भन्ने चिन्ता रहेको बताए ।
परराष्ट्रविद् हीरण्यलाल श्रेष्ठले चीन र भारतको विरुद्धको सैनिक गठबन्धन गर्न नहुने बताए । उनले १९५० को शान्ति तथा मैत्री सन्धि पुनरावलोकन गर्नुपर्ने भनाइ राखे । नेपाल र भारतका विज्ञ तयार पारेको ईपीजी प्रतिवेदन भारतीय प्रधानमन्त्री नरेन्द्र मोदीले बुझ्नुपर्ने बताए ।
